Askotariko diziplinak fusionatuko ditu Arte Egunak egitasmoak
Hilaren 9tik 11ra arte diziplina ugariz gozatzeko aukera izango da. Kulturabirusa egitasmoak azken bi urteetan "herriko kulturgintzan utzitako arrastoari eta saretzeari segika" antolatu dute, helburu oso antzekoekin.
Iazko udan egin zuten kultur ekitaldietako bat. Artearen zaleek hitzordu hirukoitza izango dute hurrengo asteburuan, herriko kultur zale talde batek Oiartzungo Arte Egunak antolatu baititu, udalarekin elkarlanean.
Kulturabirusa egitasmoak azken bi urteetan “herriko kulturgintzan utzitako arrastoari eta saretzeari segika” antolatu dute, helburu oso antzekoekin: “uda giroan ere kultur ekitaldien aniztasuna bultzatzea, diziplinartekotasuna eta esperimentazioa, herriko kultur eragileen, sortzaileen eta kultur zaleen arteko elkar-ezagutza eta saretzea bultzatzea”.
Hiru egunez luzatuko dituzte Arte Egun horiek, hilaren 9tik 11ra hain zuzen. Ondorengoa da egitaraua osorik:
- Hilak 9 (ostirala): Hiru Binaka saioa egingo dute. Herriko sei sortzaile bikoteka pieza bana sortuko dute. Miriam Unzueta Olga Corrochanorekin ariko da, Malen Elizasu Xabier Belaunzaranekin eta Amets Badiola Alaia Martinekin. Sarrerak Garmendi txokolategian eskuratu beharko dira.
- Hilak 10 (larunbata): Poesia Eguna izango da. Bidegorriko hiru gunetan hiru errezitaldi eskainiko dituzte 11:00etan, ‘Gaizkileak’ gaia ardatz delarik. Lehenengo bi guneetan literatur zale eta idazleek hainbat testu irakurriko dituzte; hirugarrenean Euskal Herriko hainbat poetek aurten argitaratu dituzten liburuak aurkeztuko dituzte. Iraia Etxebeste, Aiako Harria Gaztelumendi, Elixabete Perez Gaztelu, Oihana Muxika, Ahetz Kortajarena, Ekhi Arizmendi, Elias Arizmendi, Mirari Telletxea, Marti Casanova eta Anari Larburuk irakurriko dituzte poesia horiek. Idazleak aldiz, ondorengoak izango dira: Karmele Mitxelena, Alain Mendizabal Txilly, Olatz Mitxelena, Aintzane Galardi, Josu Ibarguren, Pello Añorga eta Miren Azkarate. Hainbat gonbidatuk ere parte hartuko dute saioetan: Juan Luis Zabala, Lizar Begoña, Maite Lopez, Ekaitz Goikoetxea, Aritz Gorrotxategi eta Itxaro Borda. 14:30ean aldiz, arte bazkari aktiboa egingo dute, Bazkun Zahar elkartean.
- Hilak 11 (igandea): Artisau eta sortzaileen azokak Eliza ingurua hartuko du. Honako sortzaileek parte hartuko dute: Rbelde, Maitandu Makrame, Puochinah, Oliparok, Sorginlore, Lei lei, Arratibel, Txirikorda, Loregorri, Xipiroi serigrafia, Kosta itsas-egurrak, Ane, Ehunduz, Ainara Lasa, Izaro, Maixa, Borealak, Allende Arnaiz, Koöl, Luma moda etikoa, Hamarratz, Zizkamizka eta Gar-gar.
