Oarsoaldeako AEK-k, ikasturte berrirako prest
Matrikulazio kanpaina abiatu berri dute lau euskaltegiek. Klaseetatik harago, txangoak, tailerrak, saio bereziak eta bestelakoak indartzeko apustua egingo dute aurten, "erabileraren oinarritutako metodologia delako gurea".
Oarsoaldeko lau AEK euskaltegiek matrikulazio kanpaina abiatu berri dute, horren berri eman dute gaur Oiartzunen emandako agerraldi batean. 2022-2023 ikasturtea urrian hasiko dela jakinarazi dute, 3an hain zuzen.
Askotariko eskaintza izango dute ikasturte honetan ere ikasleek: euskalduntze ikastaroak, mailak egiaztatzekoak, C2a lortzekoak, autoikaskuntza, merkatarientzako eta gurasoentzako ikastaroak, langabetuentzako trinkoak, mintza taldeak, eskualdeko irakasleentzako formakuntza, C1 mailako azterketa prestatzeko eskolak… Eta aurten ere bekak eskuratu ahalko direla aurreratu dute gaur, “asistentzia ona izaten badute”.
Klaseetatik harago, txangoak, tailerrak, saio bereziak eta bestelakoak indartzeko apustua egingo dute aurten, gaurkoan gaineratu dutenez, “erabileraren oinarritutako metodologia delako gurea”.
“Euskara ikasi edo hobetuko dute gurera datozenek, baita mailak egiaztatu ere; baina horrez gain, euskara gehiago erabiliko dute, dudarik ez izan”.
AEKko kideek erantsi nahi izan dute urritik aurrera irakaslea izango dutela bidelagun ikasleek, “altxorrik garrantzitsuenak” baitira, “ikaslearen pertsonarik hurbilenak”.
Azkenik, ospakizunez betetako ikasturtea izango dela gogoratu dute. Izan ere, batetik, Euskaraldia dator udazkenean, eta bestetik, Oiartzungo Intxixu AEKk egoitza berria estreinatuko du Mendiburu 14 eraikinean.
