'Euskaraz barra-barra' marka sortu dute, bezeroek euskaraz egitea errazteko
Irailetik Euskaraldia hasi arte, Lezo, Oiartzun eta Pasaiako dendetan probatuko dute marka berria. Urtarrilean Euskal Herrira zabalduko da.
'Euskaraz barra-barra' markaren logoa. Euskararen erabilera arlo sozioekonomikoan sustatzeko helburuarekin, Eusko Jaurlaritzak, Nafarroako Gobernuak eta Euskararen Erakunde Publikoak Euskaraz barra-barra marka sortu dute.
Berez, egitasmoa urtarriletik aurrera jarriko da, baina zenbait udalerrik lehenago probatuko dute; tartean, eskualdeko hiruk: Lezok, Pasaiak eta Oiartzunek. Irailetik Euskaraldia hasi bitarte iraungo du probak.
Markaren xedea euskal lurralde osoko zerbitzu sektorean euskararen erabilera handitzea izango da. Horretarako, denden kanpoaldean pegatina bereizgarri bat jarriko da, erosleak jakin dezan denda horretan euskaraz egin eta ulertuko diotela.
Marka berria saltokietan jartzeko baldintzak honakoak dira:
- Hamar langile arteko dendetan, langileen %50ak euskara ulertu beharko du. Hamaika langiletik gorakoetan, berriz, %30ak.
- Langile guztiak euskaldunak ez diren saltokietan, euskaraz dakiten langileek txapa edo lepoko identifikagarri bat eramango dute, markaren irudi berarekin.
