[Erreportajea] Arte Egunak, "kultura beste modu batean gozatzeko"
Oiartzungo sortzaileek artez beteko dituzte herriko txokoak gaurtik etzira bitarte. Kulturabirusak sortutako olatu horri jarraipena eman nahi izan diote herriko hainbat kulturzalek.
Oiartzunek eta arteak lotura estua dutela erakutsiko dute beste behin herriko sortzaileek. Gazte eta heldu, guztiek tarte eta txoko bat izango dute gaurtik igandera bitarte, herriko kulturzale talde batek Arte Egunak izeneko egitasmoa antolatu baitu.
Kulturabirusa egitasmoaren baitan kokatu behar da asteburu honetakoa, honek «utzitako arrastoari, saretzeari eta olatuari segika» antolatzea erabaki dutela kontatu dio HITZAri Oier Guillan talde eragileko kideak. «Azken bi urteetan sortutako energia hori mantendu eta birbideratzea pentsatu genuen, saretze horren bidez ikusi genuelako kulturari balioa eman eta gogoeta egiten genuela etengabe jendearekin, gauza oso positiboak sortu zirela», erantsi du.
Asteburuko egitarauan diziplina ugari ukitu nahi izan dituzte, «profil askotariko» sortzaileak elkartuko ditu egitasmoak. Margoa, poesia, literatura, artisautza… Denek izango dute zer eskaini eta zer ikusi.
Herrian kulturgintza puri-purian dagoela uste du Guillanek, «indar handia» duela. «Panorama oso anitz eta aberasgarria dago herrian, oso interesgarria. Kontzientzia edo nahia dago». Sortzaileen eta ikusleen artean hartu-emana egongo dela aurreratu du, «kultura beste modu batean gozatzeko» aukera emango baitute hiru egunek oiartzuarraren ustez. Saio edo ekitaldi guztiak oso parte hartzaileak izango direla dio. «Gozamenaren bitartez herrian eta inguruan zer daukagun ikusteko balioko dute arte egunek, askotan ez baitugu ezagutzen etxean bertan ditugun altxorrak».
EGITARAUA
Gaur
- 19:00. Hiru Binaka saioa. Herriko sei sortzailek bikoteka pieza bana sortuko dute.
Bihar (poesia eguna)
- 11:00. Bidegorriko hiru gunetan hiru errezitaldi eskainiko dituzte herriko eta Euskal Herriko hainbat poetek.
- 14:30. Arte bazkari aktiboa egingo dute Bazkun Zahar elkartean.
Etzi
- 10:00-14:30. Artisau eta sortzaileen azoka egingo dute eliza inguruan, Oiartzungo eta inguruko parte hartzaile ugarirekin.