Urdaburuk Pirinioetara asteburuko irteera antolatu du
Irailaren 24 eta 25eko asteburuan izango da hori. Horrez gain, hilaren 17an Tolosaldeko biraren seigarren etapa ere antolatu du.
Indartsu ekingo diote ikasturte berriari Urdaburu Mendizale Elkartean. Izan ere, irailaren 24an eta 25ean mendi irteera antolatu dute Pirinioetara. Hain zuzen, larunbatean Lizaratik abiatu eta Candanchun hartuko dute atseden, hurrengo egunean Lizarara itzultzeko. Ibilbide zirkularra proposatu dute, 30 kilometro ingurukoa (eguneko 15 km) , eta ibilbideko punturik altuena Aspe mendia (2645 metro) igotzerakoan izango dute; igandean izango da hori. Asteburu pasak 70 euroko kostua izango du, garraioa eta ostatua barne (pentsio erdia: afaria eta gosaria). Izen-ematea irailaren 22ra arte dago zabalik, eta honako bide hauek erabiliz egin daiteke: galdetegi hau betez edo astearte eta ostegunetan, 19:00etatik 21:00etara, elkartearen egoitzara bertaratuz edo 943 52 78 79 telefonora deituz.
Bestalde, asteburu bat lehenago, hilaren 17an, Tolosaldeko biraren seigarren etapa ere antolatu du elkarteak. 18,5 kilometroko ibilbidean, Larraitz eta Ikaztegieta kateatuko dituzte. Ibilbideak 450 metroko desnibela du, eta sei orduko iraupena izatea aurreikusten da. Izen-emateak elkartean egin daitezke, goian azaldu moduan, edo galdetegi hau betez.