Garagar, lupulu eta legami zaporea izango du urriak
Oiartzungo Garagardo Festa bueltatuko da. Bost gau iraungo ditu hamaseigarren ekitaldiak, urriaren 11tik 15era.
Garagardo pitxarrak nahi adina betetzeko aukera egongo da urriaren 11tik 15era. Bi urteko lehortearen ondoren, oiartzuarrek garagardo mota andanarekin zintzurra bustitzeko aukera izango dute urriaren erdialdean.
Bueltan da Oiartzungo Garagardo Festa, eta itzulera modu egokian ospatzeko, bost gauez irekita egongo da plazan jarriko duten karpa.
Urriaren 11tik 15era izango da festaren hamaseigarren ekitaldia. Ohi bezala, garagardo eskaintza handiaz gain, sabelean oinarria egiteko hainbat jaki eskainiko dituzte, garagardoaren kulturaren menukoak.
Bost egunetan 19:00etan irekiko dituzte garagardo iturriak. Hilaren 12an eta 13an 00:00etan itxiko dute karpa, eta beste hiru egunetan ordubete geroago. Gainera, beranduxeago ixten duten egun horietan zozketa bereziak egingo dituztela iragarri dute antolatzaileek, 22:00etatik 23:00etara. 60tik gora sari zozkatuko dituztela ziurtatu dute.
