Ostegunean hasiko dira urteroko auzo batzarrak, Altzibarkoarekin
Urriaren 6an izango da aurtengo bilera sortaren azkeneko saioa. Udalaren eta herritarren arteko elkarlana sustatu nahi dute.
Udaleko ordezkariek auzo batzarretan parte hartzera animatu dute. Oiartzungo Udalak jakinarazi duenez, datorren ostegunean —hilak 26— hasiko dira aurtengo auzo batzarrak. Udalaren eta herritarren artean elkarlanean aritzeko “aukera paregabea” direla azaldu dute, baita auzoetako egoeraren aurrean hausnartzeko ere.
Lehenengo bilera Altzibarren egingo dute, goiko eskoletan. 19:00etan hasiko da saioa, gainontzeko guztiak bezala. Udalak adierazi duenez, udalaren, herriaren eta auzoaren berri emateaz gain, bukatzear den agintaldiaren balorazioa ere partekatuko dute auzotarrekin.
Altzibarren kasuan, auzoa biziberritzeko lanen egoeraren berri emango dute eta udalak bertan egin nahi duen frontoiaren proiektuaz ere hitz egiteko aukera egongo dela iragarri dute.
Parte hartzeko deia
Auzo batzarrak “Oiartzun elkarrekin eraikitzeko” bidea direla azpimarratu du Jexux Leonet Oiartzungo alkateak. “Herri bizia eta kohesionatua sortzeko balio dute, iritziak partekatu eta adostasunetara iristeko aukera ematen baitute”, zehaztu du alkateak.
Horregatik, bileretan parte hartzera deitu ditu oiartzuarrak, baita beraien proposamenak egitera ere. Helburua Oiartzun “guztion artean hobetzea” izango dela gaineratu du Leonetek.
Egitaraua
- Altzibar: Irailak 29, osteguna (goiko eskoletan).
- Arragua: urriak 3, astelehena (frontoi ondoko lokalean).
- Karrika: urriak 3, astelehena (Artason).
- Ergoien: urriak 4, asteartea (Auzokalten).
- Ugaldetxo: urriak 4, asteartea (Isasti auzo lokalean).
- Gurutze: urriak 5, asteazkena (Bizardia elkartean).
- Iturriotz: urriak 5, asteazkena (Argiñeneko auzo lokalean).
- Elizalde: urriak 6, osteguna (pleno aretoan).
