San Tomas egunerako motorrak berotzen hasiko dira
Bi urteko hutsunearen ondoren, aurten bai, San Tomas egunaz gozatuko dute herritarrek. Antolaketa lanetan dabilen batzordeak lehen bilera irekia egingo du datorren urriaren 7an.
Aurten bai, txistorra usaiak eta festak Zumardia eta ingurua hartuko dute abenduaren 21ean, pandemiak azken urteetakoak bertan behera utzi baditu ere, aurten zorionez bai, San Tomas egunaz gozatuko baitute herritarrek. Neguko Solstizioa-San Tomas Batzordea motorrak berotzen hasi da jada, datorren urriaren 7an (ostirala da) lehen bilera irekia egingo dutela jakinarazi dute. Merkatuzarren bilduko dira, 19:00etan, eta herritar oro gonbidatu dute bertaratzera.
Honi lotuta, batzordeko kideek jakinarazi dute San Tomas egunean txistorra postuak jartzeko eskaera epea gaur bertan zabaldu dutela, eta urriaren 11n itxiko dutela. Eskaera horiek Zu! Zure Udala arreta zerbitzuan aurkeztu beharko dira, dagokion eredua beteta. Eredu horiek udaletxean bertan eskuratu daitezke.
Azkenik, gogoratu dute postua jarriko duten elkarteak urriaren 7ko bilerara joan beharko direla.
