Zabala Enea II gaztetxeak 22. urteurrena ospatuko du urriaren 15ean
22 kandela itzaliko ditu eraikinak aurki, eta urteurrena behar bezala ospatzeko egitarau oparoa prestatu du Oreretako Gazte Asanbladak.
Gaztaño auzoko jaien harira gaztetxean antolatutako haurrentzako tailerretako bat. Urria iristear da eta urtero bezala, urteurrena ospatzeko motorrak berotzen hasi dira jada Zabala Enea II gaztetxekoak. 22 kandela itzaliko ditu eraikinak hilaren 15ean, eta urteurrena behar bezala ospatzeko egitarau oparoa prestatu du Oreretako Gazte Asanbladak urriaren 15erako (larunbata da).
19:00etan hasiko dute urteko festa handia, poteo elegante batekin. Gaztetxetik abiatuko dira gazteak, herriko kaleetan barrena ibiliko dira. 21:30ean aldiz, afaria egingo dute gaztetxean. Sabelak ongi bete ondoren bertso saioa eskainiko dute Joanes Illarregi, Ekhiñe Zapiain eta Xabat Illarregik. Eta gaua biribiltzeko, Dj Txorimalok dantzan jarriko ditu bertaratutakoak, luze joko du festak.
Afariko txartelak gaurtik (hilak 26) eskura daitezke, 10 euroren truke, Sindi eta Arkaitza tabernetan.
