Isaac Palencia izango da PSE-EEren alkategaia
2023ko udal hauteskundeetarako aurkeztutako hautagai bakarra izan da. Gehiengoaren alde egingo duen gobernu bat osatu nahi du, eta bere helburu nagusia "EH Bilduren eta alkatearen aldetik Errenteriak pairatzen duen utzikeria gelditzea" dela adierazi du.
Isaac Palencia. Gipuzkoako PSE-EEk dagoeneko aukeratu ditu 2023ko udal hauteskundeetarako alkategaiak. Errenteria-Oreretan Isaac Palencia izango da hautagaia, herrian aurkeztu den bakarra izan da, eta taldeak ohar batean azaldu duen bezala, beharrezko bermeak jaso ditu.
2010ean hasi zuen ibilbidea politikan, alderdiko gazte taldean. 2021tik zinegotzi izan da herrian, eta 202an Jose Angel Rodriguezen lekukoa hartu zuen, taldearen bozeramailetza eskuratuta. Egun, Gipuzkoako Foru Aldundiko Gazteriako zuzendaria da. 35 urte ditu.
Palenciaren hitzetan, “ohore handia” da hautagai izatea, baina baita ere “ardura bat”. Gehiengoaren alde egingo duen gobernu bat osatu nahi du, eta bere helburu nagusia “EH Bilduren eta alkatearen aldetik Errenteriak pairatzen duen utzikeria gelditzea” dela adierazi du.
“Politikan sartu nintzen gauzak aldatzeko eta beti izan dut gauza bat argi, gehiago merezi dugula herri bezala. Nire asmoa anbizio handiko eta berritutako proiektu baten buru izatea da, sozialistek kudeatuta, eta Errenteria eraldatzeko bideratutakoa”, erantsi du hautagaiak.
