"Bere jatorrizko esentzia, giroa eta ilusioa berreskuratu du Atlantikaldiak"
Publikoaren erantzuna "ezin hobea" izan dela dio udalak. Aurtengo edizioaren balorazio oso positiboa egin dute: "jatorri ezberdinetako herritar eta hizkuntzak espazioak partekatzen ikustea benetan da pozgarria".
Larunbateko irudi bat. IX. Atlantikaldiak antolatzaileen aurreikuspenak bete ditu, jaialdia bukatu eta egun gutxira, aurtengoaren balorazio oso positiboa egin berri baitu Errenteriako Udalak. “Azken bi urteetako edizio egokituen ondoren, Atlantikaldia itzuli da; kalera atera da. Bere jatorrizko esentzia, giroa eta ilusioa berreskuratu ditu eta publikoaren erantzuna ezin hobea izan da”.
Aurten ere “kalitatezko programazio anitza” eskaini duela erantsi dute, hori baita, udalaren ustez, Atlantikaldiaren “arrakastaren giltzarrietako bat”. Egitaraua anbiziotsua izan dela diote, eta horrek erakarri dituela herriko kaleak bete dituzten jatorri, adin eta genero ezberdinetako familia eta lagun taldeak. Hori baita udalaren esatean Atlantikaldia: “guztiontzako musika jaialdi eta kultur topagunea”.
Udaleko iturriek gaineratu dute aurten ere programazioa “nortasun propioa” izan duten lau gunetan banatu dutela, eta guztiek publiko zabala erakarri dutela. Honi lotuta, artisten parekidetasunaren alde jaialdiak egiten duen apustua nabarmendu dute, baita ere oholtza gainean emakumeek izan duten presentzia handia.
Komunitate ezberdinen arteko elkarbizitzari ere balio handia eman dio udalak. Urteen poderioz Atlantikaldiak herritarrek topo egiteko eta elkar ezagutzeko “molde propioa” sortu duela ere esan dute. “Egitaraua osatu duten ia 70 ekintzetan jatorri ezberdinetako herritar eta hizkuntzak espazioak partekatzen ikustea benetan da pozgarria”.
Jaialdiak izan duen kutsu solidarioari ere balioa eman nahi izan dio udalak. Izan ere, Sukaldian egitasmoarekin 890 euro jaso zituzten Zaporeak eta Ukrania Euskadi elkarteentzako.
Azkenik, antolakuntzan parte hartu duten guztiei eskerrak eman dizkie udalak, eta nabarmendu dute “Errenteria kultur erreferente izan dadin Atlantikaldiak egiten duen lana”.
