Zerga eta tasak %1'5 igoko dira, "kalitatezko zerbitzuak ematen jarraitzeko"
EH Bilduren aldeko botoekin aurrera atera da 2023ko tasa eta zergen ordenantza. Guraso bakarreko familia eta ugarientzako, hobariak.
Asteazken arratsaldean egin zuten iraileko lehenengo plenoa.
Asteazken arratsean egin zuten irailari dagokion ohiko udalbatzarra, ikasturteko lehenengoa. Hamabi puntu jorratu zituzten, eta horietan garrantzitsuena izan zen 2023ko zergak eta tasak finkatu behar zituena.
EH Bilduren aldeko botoekin, %1’5 igoko dira tasa eta zerga gehienak, salbuespen batzuekin. Jon del Olmo Ogasun zinegotziak gogorarazi zuenez, normalean KPI igo ohi da, baina aurtengoa altuegia izango denez, zifra hori aplikatuko dela.
“Jakitun gara egoera ekonomikoa zaila dela, soldatek eta pentsioek ez dutela KPIak izan duen igoera eduki eta herritarrek eroste ahalmena galdu dutela”, azaldu zuen Del Olmok.
Igoera %1’5ekoa izatea justifikatu zuen, udalak “zerbitzu publiko duinak” ematen jarrai dezan.
Horrez gain, guraso bakarreko familien egoera aztertu dutela zehaztu zuen, eta lehen aldiz hobariak izango dituzte kiroldegian eta udalekuetan.
EAJren abstentzioa
Tasa eta zergen ordenantzaren gaineko bozketan, Janire Mitxelena jeltzaleen eledunak iragarri zuen bere taldeak abstentziora joko zuela.
Zerga batzuekin ados egon arren, ez alde ez kontra egitea erabaki zuten: “Gauden egoera kontuan izanik, zergak izoztea egokiagoa iruditzen zaigu, administrazioa herritarren ongizatea bermatzeko dagoelako. Ziurgabetasun egoeretan esku bat bota eta herritarrak babestu behar dira”.
Gainontzeko puntuak aho batez onartu ziren.
