[Galeria] "Ahalegin handiz konkistatutako eskubideen defentsara eta borrokara" deitu du Duintasunak
Udako etenaldiaren ondoren indartsu itzuli dira pentsiodunak, mobilizazio jendetsua egin dute gaur. Haien bizi baldintzak "aurrekaririk gabe hondatzen" ari direla salatu dute gogor.
Dozenaka herritarrek erantzun diote Duintasunaren deiari. Duintasuna pentsiodunen elkarteak dozenaka herritar bildu ditu gaur ere, hileko lehen astelehenen guztietan bezalaxe. Udan geldialditxoa egin dute, eta udazkenerako indartsu itzuli direla erakutsi dute gaur. Udaletxe parean bildu ondoren herriko kaleak aldarrikapenez bete dituzte.
Pentsiodunen bizi baldintzak “aurrekaririk gabe hondatzen” ari direla esanez hasi dute gaurko mobilizazioa. Mendekotasunaren laguntza, etxez etxeko arreta edo egoitzetan izandako kaltea jarri dituzte adibide gisa, gehienak “zainketak despertsonalizatzen dituzten eta lan baldintzak degradatzen dituzten funts pribatuek kudeatuta” direla salatzeaz gainera. Horregatik langile klase osoari dei egin diete “ahalegin handiz konkistatutako eskubideen defentsara eta borrokara”.
Aurtengo urtarrilean indarrean sartutako pentsioen erreformaren lehen zatiaz aritu dira, “2022n ezarritako murrizketak sendotu dituena” haien ustez. Salatu dute erretiro adina 65 urtetik 67ra atzeratu dutela, eta 15 urtetik 25 urtera igaro dela pentsioa kalkulatzeko tartea. “2013ko erreforma indargabetu egin da, pentsioak eguneratzeko %0,25 eta pentsioak bizi itxaropenaren arabera automatikoki murrizten zituen iraunkortasun faktoreak ezartzen zituena, baina batez besteko KPI bat eta belaunaldien arteko ekitate mekanismo bat ezartzen duen murrizketa berriak iragartzen dituena”, esan dute amorruz.
Orain, pentsioak azaroko KPIaren arabera eguneratu beharrean batez besteko KPI bat hartzen dutela erantsi dute, “gure erosteko ahalmena nabarmen murrizten duena”. Horri lotuta, BAEM bat onartu dutela ere esan dute, 2032ra arte kotizazioak igotzea ezartzen duena, “GSren erreserba funts berri bat sortzeko”. Funts hori erabiliz gero, kotizazioen igoera berriak edo gastuaren murrizketak adostu daitezkeela aurreratu dute kezkati.
Genero arrakalaren aurkako neurriak “bidean” utzi dituztela ere salatu dute, hala nola, alarguntza pentsioak %100era igotzeko neurria edo 40 urte baino gehiago kotizatuta izan eta aldez aurretik erretiroa hartu behar izan zutenentzat bideratutakoak. “Hala ere, pentsioen funts pribatuak onartu dituzte, patronal handien, bankaren, aseguru etxeen eta antzekoen mesedetan”.
Espainiako Gobernua pentsioen erreformaren bigarren zatia negoziatzen ari dela esan dute gaurko mobilizazioan, “pentsiodunen mugimenduari informaziorik eman gabe, eta ez du sozietatearen aurrean bere benetako asmoak argitu, Europako Batzordearekin kotizazio urteak luzatu eta, hala ere, ukatu egin dituelako”. 25etik 35era igaroz gero, pentsioak %8,1 murriztuko direla salatu dute, “lan karrerak kotizazio hutsuneekin nahasten” ari direla. Finean, pentsioak murrizten jarraitzea helburu dutela salatu dute.
Bestalde, errenta altuenei mesede egiten dieten gehieneko kotizazio oinarriak kentzea negoziatzen ari direla salatu dute gogor. “Espainiako Gobernuak 25 urtetan handitu nahi du maximoa, baina pixkanaka, hasiera finkatu gabe, eta kontrapartida gisa, kobratuko luketen gehienezko pentsioa handitu nahi die”, esan dute. Pentsiodunek ordea, kotizazio topeak kentzearen alde egin dute, eta “hiru milioi autonomo baino gehiagok benetan ordaintzen dutenagatik ordaintzea” defendatu dute.
Kaleetan jarraitzeko premiaz aritu dira azkenik, “soldatak eta pentsioak benetako KPIarekin birbaloratu daitezen, GSren auditoria egin dadin, eta batez ere, gutxieneko pentsioak hilean 1.080 euroraino igo daitezen, bizitzaren garestitzearekin eguneratuta. Lotsagarria da milioika pentsiodunek, gehienak emakumeak, lan eta zaintza bizitza baten amaieran, pobrezia eta gizarte bazterkeria bultzatzen duten pentsioak kobratzea”.
Hilaren 15ean, Madrilera
Espainiako Estatu osoko pentsiodunek hitzordu garrantzitsua dute datorren hilaren 15ean (larunbata da) Madrilen (Espainia). Mobilizazio jendetsua egingo dute, eta eskualdeko pentsiodunak ere bertan izango dira. Autobusak antolatu dituzte horretarako. Interesdunak Duintasunarekin jarri beharko dira harremanetan.
