Gipuzkoa Bik finalerako txartela eskuratu du
Gipuzkoarrak Iparralde Bat taldea osatzen duten senpertarrei aisa irabazi diete bote luzeko txapelketan. Bizkaiaren kontra arituko dira finalean.
Berdez jantzita, senpertarrak, eta zuriz, oiartzuar eta villabonarrak. Atzo eguerdian jokatu zuten Euskal Herriko Bote Luzeko Txapelketako bigarren finalerdia. Aurreko asteburuan jokatu behar zuten, baina eguraldiaren erruz bertan behera utzi behar izan zuten.
Igande eguerdian eguraldi ederra ari zuen, eta are hobea izan zen Gipuzkoa Bi taldearentzat. Iparralde Bat-ekin neurtu zituzten indarrak, eta aise irabazi zuten gipuzkoarrek: 11-1 nagusitu ziren.
Iparraldeko taldea Senpereko (Lapurdi) pilotariek osatzen zuten, eta Gipuzkoakoa Oiartzungo Txost elkarteko sei pilotarik eta Villabonako Bear Zanako beste bik.
Pilotari oiartzuarrek gehiengoz osatutako taldeak Bizkaiaren kontra jokatuko dute finala, datorren asteburuan, eguraldiak uzten badu. Aurtengoa Euskal Herriko Bote Luzeko Txapelketaren seigarren ekitaldia da.
Igande eguerdian jokatu zuten finalerdia.
