Orain arteko bidea ospatu eta aurrera begirako erronkei heltzeko ekitaldia egingo du EH Bilduk
Jada hamaika urte bete dira koalizio subiranistak alkatetza lortu zuenetik. Orduan hasitako "bide eder" horren inguruko gogoeta egin nahi dute herrikideekin.
Aizpea Oategi EH Bilduko kanpaina amaiera ekitaldian. Errenteria-Oreretako EH Bilduk ekitaldi berezia egingo du datorren hilaren 22an (larunbata da). Jada hamaika urte bete dira koalizio subiranistak alkatetza lortu zuenetik, eta “bide eder” horren inguruko gogoeta egin nahi dute militante eta herrikideekin. “Askorako balio izan dute hamaika urte hauek. Eta herri proiektu berri hau, udalgintzan, elkarteetan, eragileetan ehunka herritarrek egindako lan handiari esker izaten ari da posible”, esan dute taldekoek.
Horregatik, bidegile guztiekin batera orain arteko ibilbidea ospatu eta aurrera begirako erronkei heltzeko ekitaldia izango dela aurreratu dute. Lekuona Fabrikan bilduko dira, 12:o0etan. Bertaratzeko aldez aurretik izena eman beharko da, lotura honetan.
