Ander Iñarrak etxe ondoan izango du Munduko Kopako azkena
Gorbeia Suzien mendiko lasterketan ariko da larunbatean. Munduko Kopan laugarren da lezoarra, eta podium nagusiari kosk egin diezaioke emaitza ona lortuz gero.
2022ko Skyrunners World Series Munduko Kopako azken lasterketa jokoan izango du Ander Iñarra lezoarrak larunbatean: Gorbeia Suzien. Etxe ondokoa da, Zeanurin (Bizkaia) hasten eta bukatzen delako. Indar handia ari da hartzen lasterketa, are gehiago aurten: Munduko Kopako azken lasterketa denez, ohiko lasterketen puntu bikoitzak banatuko dira lehenen artean. 33 kilometroko mendiko lasterketa da, 2.500eko desnibel positiboarekin.
Erne. Iñarrak postu on bat lortzen badu, Munduko Kopako irabazle izan daitekeela. Egun, laugarrena da Skyrunners World Series txapelketan Merrell taldeko lezoarra, 244 punturekin. Lehena Damien Humbert frantziarra da, 288rekin, bigarrena Christian Mathys suitzarra 260rekin, eta hirugarrena Nicolas Molina espainiarra 246rekin. Beraz, horiek Iñarrak baino egun txarragoa badute, lezoarrak kosk egin diezaioke sailkapen nagusiko podiumeko koskaren bati, eta zergatik ez, garaipen nagusiari. Igandeko probaren parte hartzaileak ikusteko (elitekoak) joan lotura honetara.
Munduko Kopa horretako azken aurreko lasterketa irailaren 24an zuten, Bulgariako Pirin Extreme (38 kilometrokoa). Aurrekari arriskutsua lezoarraren ametsei begira: orduko hartan Lezoko kirolaria hirugarren iritsi zen helmugara emaitza oso ona lortuz, baina irabazle Mathys suitzarra izan zen, eta bigarren Molina.