Aurten Madalensoron jarri dute karpa, eta toki aldaketak ez du inor uxatu. Oraindik beste lau gau geratzen dira gozamenerako.
Boluntarioek erruz lan egin behar izan dute lehen gauean. 
Kokaleku berria du Oiartzungo Garagardo Azokak, baina horrek ez du bere arrakastan eragin ikusgarririk eduki. Atzo arratsaldean —19:00etan— ireki zuten Madalensoron jarritako karpa, eta jende dezente hurbildu zen bertara.
Hamabostetik gora garagardo-iturri daude dastagarri, mota askotakoak: horia, gorria, IPA, beltza, alkoholik gabekoa… Likidoak ez ezik, ahora eramateko gozagarri solidoak ere eskura daitezke. Eskaintza ez da makala: ukondoak, saiheskia, entsaladak, patatak eta abar prestatzen aritu ziren barraren atzean zein sukaldean aritu zirenek.
Afaltzeko ordua iritsi ahala, herritar gehiago hurbildu ziren karpara. Ilara luzea sortu zen haren inguruan. 22:00etan, berriz, zozketen txanda izan zen.
Atzo hurbildu ez zenak edo tokirik gabe geratu zenak datozen lau gauetan izango du hurbiltzeko aukera. Atzo gehiegi gozatu zuen baten batek utziko dio tokia…
Oarsoaldeari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako. Herrigintza egin nahi dudalako. Oarsoaldeko euskarazko komunitatearen parte izan nahi dudalako. Oarsoaldeko herritarrok behar dugulako. Zure ekarpena behar dugu, babestu tokiko euskarazko komunikabidea.
