Beraungo anbulatorioko murrizketez aritzeko "presazko bilera" eskatu du alkateak
Aurrerantzean 17:00etatik 20:00etara itxiko dute, profesional faltagatik. Horregatik, "hartutako erabakian atzera egin eta zerbitzua lehengoratzea" eskatu dio Aizpea Otaegik Gotzone Sagardui sailburuari, zerbitzua mantentzea "funtsezkoa baita" haren ustez.
Beraun auzoko osasun zentroa. Aizpea Otaegi alkateak gutun bat bidali berri dio Gotzone Sagardui sailburuari, bilera bat eskatu dio Beraungo osasun zentroko egoeraz aritzeko, jasango dituen “murrizketak direla eta”. Izan ere, jaurlaritzak jakinarazi du aurrerantzean anbulatorioa 17:00etatik 20:00etara itxiko dutela, “profesionalen falta dela eta”.
Orain arte zabalik izan bada, “40.000 herrikideen osasuna bermatzeko beharrezkoa delako” izan dela gaineratu du alkateak, osasun sistema publiko eta kalitatezkoa “herri batean ongizatearen bizkarrezurra” baita haren hitzetan. “Orain, dugun zerbitzua zaindu eta etengabe hobetu beharrean, kontrako norabidean doazen erabakiekin egiten dugu topo, jakinik, duguna suntsitzeak, gure ongizatea eta etorkizuneko belaunaldiena larriki konprometitzen duela”.
Horregatik “presazko bilera” eskatu dio sailburuari, “hartutako erabakian atzera egin eta zerbitzua lehengoratzea” eskatuz, zerbitzua mantentzea “funtsezkoa baita” haren ustez.
