[Erreportajea] Elegante jarriko da Zabala Enea II urteurrenerako
Gaztetxearen 22. urteurrena ospatuko dute bihar, festa giroan. Jarduera gehienak gaztetxean izan arren, kalera ere aterako dira, herritarrei "lanean tinko jarraitzen dugula" erakusteko.
Oihan Zabla eta Haizea Ruiz, Zabala Enea II gaztetxearen atarian. Imanol Saiz Urria hilabete berezia da Zabala Enea II gaztetxearentzat, urteurrena ospatzen baitute bertan aritzen diren gazteek. 22 kandela itzaliko dituzte bihar, festa eta aldarrikapen giroan.
Herriko gazteak gaztetxera hurbildu nahi dituzte. Hori da biharkoaren helburu nagusia. “Jendeak ikus dezala lanean tinko jarraitzen dugula, espazio bat dagoela herrian gazteentzako, beraien kezka eta nahiak lantzeko”, esan du Haizea Ruiz Oreretako Gazte Asanbladako (OGA) kideak. Horregatik, gaztetxeak ekitaldi gehienak jasoko baditu ere, poteoa egingo dute herriko kaleetan barrena, “herritarrek hemen gaudela ikus dezaten”.
19:00etan egingo dute poteo hori, eta afaria bezala, elegantea izango dela aurreratu dute. “Urteurrenerako elegante jarriko da gaztetxea”. Poteo horren ondoren, gaztetxera abiatuko dira, 21:30ean afaria egingo baitute bertan. Sabelak ongi bete ondoren, bertso saioa eskainiko dute Joanes Illarregik, Ekhiñe Zapiainek eta Xabat Illarregik. “Ez da ohiko bertso saioa izango. Hainbat problematika landuko dituzte bertsolariek, eta umorea izango da nagusi, zirikatzen ibiliko dira”, esan du OGAko kide Oihan Zabalak. Gaua biribiltzeko, Dj Txorimalok dantzan jarriko ditu bertaratutakoak, gaueko ordu txikiak arte luzatuko dute festa.
Trantsizio garaia
Belaunaldi aldaketa ematen ari da Zabala Enea II gaztetxean, “trantsizio garaian” daudela kontatu du bikoteak. Egun, 18-19 urte inguruko gazte ugari hasi dira han jardunean, ederki hartu diete lekukoa helduenei. “Espazio segurua da gaztetxea, formazioa jaso, problematikak landu eta nola ez, ongi pasatzeko gunea da. Ordu asko pasatzen ditugu hemen, bigarren etxe bat aurkitu dugu gazte askok hemen”, azaldu du Ruizek.
Afarirako txartela oso gutxi geratzen direla azaldu du bikoteak. 10 euroren truke eskura daitezke azken horiek Sindikato eta Arkaitza tabernetan.
Bi kideek oroitarazi dute asteazkenero biltzen dela OGA (18:30ean). Edonolako proiektu edo egitasmoak sortu eta garatzeko nahia duten gazteei bertaratzeko gonbita egin diete: “Prest gaude entzun eta laguntzeko”.
