Gaztetxearen urteurrenari "bukaera polita" emango diote hilaren 29an
Zabala Enea II gaztetxearen XXII. urteurrena biribiltzeko egun osoko egitaraua antolatu du Oreretako Gazte Asanbladak hileko azken larunbaterako.
Joan den astean ekin zioten Zabala Enea II gaztetxeko kideek XXII. urteurrenaren harira antolatutako ospakizunei, elegante jarri zuten gaztetxea. Hilaren 29an ordea, egun handia ospatuko dute, urteurrena biribiltzeko eta “bukaera polit bat emateko” egun osoko egitaraua prestatu dute Oreretako Gazte Asanbladako (OGA) kideek.
14:00etan bazkaria egingo dute gaztetxean; 16:00etan ekitaldia; 16:30ean bertso poteoa Josu Ibarguren eta Aitzol Pikabea bertsolariekin); 21:00etan elektropottotte elektrotxarangarekin herriko kaleetan barrena ibiliko dira gazteak; eta azkenik, 23:00etan, Bubblin Sound Sytem-ek dantzan jarriko ditu Zabala Enea IIn bildutakoak.
Bazkariko txartelak Sindikato eta Arkaitza tabernetan salgai daude jada, 12 euroren truke.
