Maider Ronquete sopranoak eta Franco Cavalleri pianistak "emozioz beteriko" kontzertua eskainiko dute
Hilaren 28an 'Dejate llevar...' izeneko kontzertua eskainiko dute Niessenen, "dinamikoa eta atsegina" izango dela dio bikoteak. Sarrerak 10 euroan eskura daitezke.
Maider Ronquete soprano errenteriarrak eta Franco Cavalleri pianistak elkarrekin zapalduko Niessen beste behin, kontzertu berezia eskainiko dute hilaren 28an (ostirala da) kulturgunean. Dejate llevar… izena jarri diote kontzertuari, hori baita bikotearen asmoa: “bidaia edo paseo honetan musikak eraman gaitzala”. Emozioz beteriko kontzertua izango dela aurreratu dute, “errusiar mendi” bezala definitu dute saioa.
Kontzertu honekin haien ibilbidean “inflexio puntu bat” ezarriko dutela esan dute biek. Musika klasikoa izango da nagusi, eta bi musikariak tartekatzen joango dira. “Ezberdina izango da kontzertua. Obrak nahasten joango gara. Nik pieza bat joko dut eta ondoren beste pieza bat, Maiderrek kantatu dezan”. Hilaren 28koa “atsegingarriagoa” izango dela erantsi dute.
“Kontziente gara distantzia dagoela musika klasikoaren eta publiko orokorraren artean, berezi gazteen artean. Aurreiritziak hautsi nahi ditugu”, erantsi du pianistak. Kontzertua “oso dinamikoa” izango dela aurreratu du sopranoak: “Nire ahotsean aldaketa asko sumatuko dituzte ikusleek”, erantsi du.
Sarrerak Lekuona Fabrikan eskuratu beharko dira, 10 euroan, saioa hasi baino ordubete lehenago jarriko dituzte salgai. Bestela, erreserbak ere egin daitezkeela jakinarazi dute gaurko aurkezpenean, 617 82 17 78 telefono zenbakira deitu beharko da. Saioa 19:30ean hasiko dute, eta ordubete inguruko iraupena izango du.
