IX. Jose Manuel Azkue Memoriala, Agustinetako komentuan
Memorialaren barruko kontzertu bat jasoko du herriak azaroaren 4an. Azken hilabeteetan organoa doitzeko eta afinatzeko lanak egin dituzte, kontzerturako prest dute.
Iñaki Queral zinegotzia eta Aizpea Otaegi alkatea, parrokiko eta Oiartzungo Organozaleak elkarteko ordezkariekin. Oiartzungo Organozaleak elkarteak antolatutako IX. Jose Manuel Azkue Memorialaren barruko kontzertu bat jasoko du Errenteria-Oreretak, Agustinak auzoko komentuak hain zuzen. Izan ere, azken hilabeteetan organoa doitzeko eta afinatzeko lanak egin dituzte, urte luzez erabilerarik gabe izan ondoren, kontzerturako prest dutela jakinarazi dute gaur.
19:30ean solasaldia egingo dute bertaratutakoek musikariekin, eta 20:00ak inguruan kontzertuari ekingo diote. J. Verdin eta M.N. Bettek joko dute organoa, eta H. Ezeizak eta B. Carrerak aldiz, dultzaina, txistua eta oboea. Gaurko aurkezpenean azaldu dutenez, 200 bat lagunentzako tokia du komentuak, eta ez da aldez aurretik gonbidapenik eskuratu beharko. Saioa doakoa izango da.
Errenteria-Oreretaren ondoren, Irun (azaroak 5) eta Oiartzunen (azaroak 6) geldialdia egingo du IX. Jose Manuel Azkue Memorialak.
