Beraun kalea berrantolatzeko proiektua, martxan
Datorren urtean zehar egitea da udalaren asmoa. Jarduera ugari aurreikusi dituzte proiektuan: aparkaleku bat, berdeguneak eta auzotarrentzako guneak, besteak beste.
Beraun kalea berrantolatzeko proiektua martxan da. Gaur aurkeztu dituzte nondik norakoak Aizpea Otaegi alkateak eta Eneko Del Amo Hirigintza zinegotziak. Auzoarentzako eta bereziki kale parean bizi diren herritarrentzako “atseginagoa” egingo dute kalea, hainbat jarduera aurreikusi dituzte.
Batetik, oinezkoentzako segurtasun handiagoa bermatu nahi dute, eta aldi berean, “irisgarritasuna hobetu”. Horrez gain, bidegorriaren sarea zabaltzea ere bada asmoetako bat.
Bestetik, berdeguneak ere irisgarriagoak izango direla zehaztu dute gaur, “eta horien gozamena errazteko” etxebizitza parkearekin lotuta dagoen bide eta sarbide sare berri bat egingo dutela, eta txakur parkea aldiz, autopista azpiko magalean birkokatuko dute.
Gainera, 5 eta 15 zenbakien artean bi plaza berri eraikiko dituzte, auzotarren egonaldi espazio gisa. Lorategiak eta jolas guneak ere egingo dituzte.
Aparkaleku berri bat ere izango du kaleak, egun skate parkea dagoen tokian jarriko dute. 65 ibilgailurentzako edukiera izango du.
Hiru fasetan egingo dute proiektua. Lehenik, Beraungo pilotalekuaren ondoan lur gaineko aparkalekua eraikiko dute; bigarrenik, plaza berriak eraikiko dituzte; eta hirugarren fasean berriz, irisgarritasuna hobetzearekin lotutako lanak egingo dituzte, hala nola, espaloiei jarraitasuna emanez eta zabalduz, besteak beste.
Proiektu osorako 1,5 milioi euroko inbertsioa egingo du udalak. 2023ko lehen sei hilabeteetan lizitatzea espero dute, eta hemendik urtebete ingurura bukatzea osorik.
