[Erreportajea] Ikasitakoa mahaiaren bueltan askatuko dute, lagun giroan
Hogeita bigarren Mintzalaguna egitasmorako motorrak berotzen hasi dira Lau Haizetara Euskaltzaleon Topagunekoak. Partaideez gain, aurten dinamizatzaileak ere behar dituztela jakinarazi du elkarteak.
Xixilio Maritxalar eta Iker Gomez, Lau Haizetara elkartearen kanpoaldean. Euskaraz aritzeko ohitura zertxobait baztertuta edota inguruan aritzeko arnasgune handirik ez dituztenei aurten ere aukera paregabea eskainiko die Lau Haizetara Euskaltzaleon Topaguneak. Mintzalaguna egitasmoa bueltan baita, berritasunekin dator hogeita bigarren edizioa. Urtarrilean abiatuko badute ere, lehen zertzeladak eman dituzte elkartekoek.
Euskaltegian, etxean edota kalean ikasitako hori «askatzea» da egitasmoaren xedea, hori kontatu du elkarteko kide Xixilio Maritxalarrek: «Urrats bat izan nahi du euskalduntze prozesuan, normaltasunez uler, entzun eta hitz egin dezaten partaideek». Horretarako, batetik, ohiko talde dinamikak egingo dituzte, hiru-lau lagun artekoak. Alboan mintzalaguntzailea izango dute talde guztiek, erraztasunak eskainiko dizkie partaideei. Horietako gehiago behar dituztela gaineratu du Maritxalarrek, horiei ere egin diete deialdia aurten. Bestetik, eta lehenengoz, irakurketa errazeko saioak ere egingo dituztela kontatu du. Horietan obra erraz eta mardulak irakurriko dituzte, taldean ere bai.
Iker Gomez elkarteko kideak nabarmendu du ez dela egitasmo itxia, denei begirakoa da. «Ez da soilik euskaltegietako ikasleentzako, horretan intziditu nahi dugu, edonork parte har dezake».
Euskaraldiaren olatua probestu nahi dute Mintzalagunari indarra emateko. Hala, mintzodromoak antolatzeko asmoa du Lau Haizetarak, horiek ere, irekiak. «Euskaraldia izanik, beste espazio kultural batzuetara zabaldu nahi dugu proiektua. Mintza saioak, bertso saioak… Euskal eta euskarazko kulturan murgiltzea ere bada gure asmoa».
Luzera begirakoa
Euskara ikasteko egitasmoekin alderatuta, mintzalaguna «luzera begirako» proiektua dela dio Gomezek: «Ez dira azterketa bat gainditzeko klaseak, talde dinamika batzuk dira, luzera begirakoak». Giro ederra sortzen dela aitortu du, Maritxalarrek ere bat egin du horrekin: «Pausoa ematen dutenak ez dira damutuko, ziur. Primeran pasako dugu, giro atsegina da, lagun artekoa».
Parte hartzeko interesa dutenek, lotura honetan informazio guztia dute eskuragarri
