Gazteen emantzipazioa errazteko proposamen bat erregistratu du EAJk
Udal baliabideen "azterketa zorrotza" egitea proposatu dute, "modu eraikitzaile eta arduratsuan" kudeatu behar direla uste baitute. "Premiazkoa da baliabideak egokitzea, benetako beharrei zuzentzeko".
Murua eta Oyarbide, gaurko agerraldian. EAJ taldeak proposamen bat erregistratu berri du udalean, herriko gazteen emantzipaziora bideratutakoa. Proposamen horren inguruko xehetasunak eman dituzte gaur taldeko Elixabete Murua eta Garbiñe Oyarbidek, batzokian egindako agerraldian.
“Denek dakigu edonorentzako beharrezkoa dela eta oinarrizkoa dela etxebizitza bat edukitze bizitza proiektu bat garatu ahal izateko eta are gehiago gazteentzako” esanez hasi du gaurkoa Muruak. Taldea beti “neurri pizgarrien” alde egon dela erantsi du, beti azaldu direla gazteen emantzipazioa laguntzeko proposamenak egitearen alde. Horretarako ezinbestekotzat jo dute Jaurlaritzarekin elkarlana egitea, “ez baita herriko arazo bat soilik, gizarte mailakoa baizik”.
Emantzipaziorako udal baliabideak egokitu behar direla uste dute jeltzaleek, “benetan beharrei” egokitu daitezen. Udalak abian dituen bi programen inguruko balorazioa egin dute. Lehenik, etxebizitza komunitarioa ez dela eraginkorra izan esan dute. 25 gazterentzako lekua badago ere, gehiengo okupazioa 14 lagunekoa izan dela salatu dute, eta bataz beste azken hiru urteetan 9-10 pertsona egon direla. “Gazteek arrazoia eman digute, ez genuen gazteen beharrak betetzeko egokia zenik ikusten. Ez dugu uste gastuen eta emaitzen arteko balantzea positiboa denik, oreka dagoenik, ez dugu eraginkor ikusten horrela mantentzea”. Aldiz, Eusko Jaurlaritzak Arramendin jarri dituen zuzkidurazko alokairuzko etxebizitzetan 136 pertsonako itxaron zerrenda dagoela gaineratu dute.
Diru laguntzei dagokionez, hauen gauzatze maila ez dela %19,2ra iritsi salatu dute. “Gauzatze maila baxuari erreparatuta begi bistakoa da diru laguntzen arrakasta falta, horren arrazoiak aztertu beharko liratekeela pentsatzen dugu”.
Udal baliabideen “azterketa zorrotza” egitea proposatu dute, “modu eraikitzaile eta arduratsuan” kudeatu behar direla uste baitute. “Premiazkoa da bi planetara bideratutako udal baliabideak egokitzea, benetako beharrei zuzentzeko”.
Gaurkoan erregistratu duten dokumentuak honako hiru proposamen biltzen ditu: etxebizitza komunitarioen erregimena aldatzea eta zuzkidurazko alokairuko etxebizitzen erregimenera egokitzea; martxan dauden udal baliabideak aztertzea, “gazteen emantzipazio beharrei eraginkortasunez erantzun ahal izateko eta diru laguntza horietara bideratutako aurrekontua eraginkortasunez erabili ahal izateko”; eta azkenik, etorkizunera begira har daitezen neurri buruzko eta helburu horretara bidera daitezkeen baliabide berriei buruzko azterketa bat egitea. “Eredu berri baterako trantsizioa egin behar dugu, ikusi dugu orain artekoak ez duela behar bezala funtzionatu eta helburua beti zian behar duela gazteen emantzipazioa sutatzea eta erraztea”.
