'Ispilua' erakusketa inauguratu dute, "ikusezin egin diren errealitateak" ikustarazteko
Zaintza lanetan aritzen diren emakume migratzaileek jasaten duten diskriminazioa eta egoera sei argazkitan islatu du SOS Arrazakeriak. Astebetez ikusgai izango da.
SOS Arrazakeria elkarteak erakusketa berezia inauguratu du gaur herrian, Ispilua izenekoa. Hainbat panel jarri dituzte Xabier Olaskoaga plazan, eta datozen zazpi egunetan (hurrengo ostiralera bitarte) Niessen merkatalgunean ikusgai egongo direla jakinarazi dute gaur elkarteko kideek.
Zaintza lanetan aritzen diren emakume migratzaileek jasaten duten diskriminazioa eta lan baldintza kaxkarrak islatu nahi izan dituzte erakusketa honetan, “ikusezin egin diren errealitateak” islatu nahi izan dituzte. “Nork zaintzen du? Nork zaintzen du nor? Zein balio du zaintzeak? Zein balio ari gara ematen herritarrei?” galderei eta beste askori erantzuna emateko sortutako erakusketa dela gaineratu dute gaurko inaugurazioan.
Etxeko langileen eta enplegatzaileen arteko topaketa eta elkarrizketa gune horiek kalera atera dituzte, “bien arteko balizko aliantzak baloratzeko” asmoz. Gogoetarako erakusketa bat izan nahi du.
Sei argazkik osatzen dute erakusketa orotara.
