Gazte Mailako EBI txapelketako finalera iristeko aukera zuten bi bikoteetako batek lortu du aurrera egitea. Partiden balantzea, negatiboa.
Oiarpeko pilotariek 22 partida jokatu dituzte asteburuan. Horietako hamar irabazi dituzte. Gehienak txapelketako lehenengo faseetakoak izan dira, baina ez guztiak.
Eskuz binakako senior mailako EBI Txapelketako jaitsiera postuak jokatu zituzten Oiarpeko iriartetarrek. Villabonako Bear Zana taldeko bikotearen kontra lan erditan geratu ziren oiartzuarrak.
Oihan Etxeberria, Beloki andoaindarrarekin batera, Etorkizuneko Pilotariak txapelketako final laurdenetan erori zen, Azkoitiko Aranbarri eta Eskuzak osatzen duten bikotearen kontra.
Bi partida horiek ostiralean izan ziren, eta larunbateko kanporaketetan, berriz, aurkia eta ifrentzua izan zituzten. Gazte Mailako EBI txapelketako finalerdiak jokatu zituzten, eta partida bakoitzean Oiarpeko bikote bana zegoen.
Oihan Etxeberria eta Landak bere partida aisa irabazi zuten, finaleko txartela eskuratzeko. Zabaleta eta Leonet 14 tantotan geratu ziren beste partidan.
Partida guztien emaitzak ikusteko, egin klik esteka honetan.
