Olegario Izagirre musikariari omenaldi berezia egingo dio Ereintza Elkarteak
"Errenterian musikaren irakaskuntzaren alde egin duen ibilbide oparoagatik" omenduko dute. Udaletxeko areto nagusian izango da ostiraleko ekitaldia, arratsaldez.
Olegario Izagirre Iruretagoiena musikariari omenaldi berezia egingo dio Ereintza Elkarteak ostiralean (hilak 11), “Errenterian musikaren irakaskuntzaren alde egin duen ibilbide oparoari” esker ona adieraziko diote. Udaletxeko areto nagusiak jasoko du ekitaldia, 19:30ean.
“Olegario Izagirre, bere konpromiso indibidual eta kolektiboarekin, gure herriaren errealitate musikalaren eraketan giltzarri izan den pertsona da, zalantzarik gabe”, diote udaleko iturriek. 1946an herriko Parrokiko Eskolanian hasi zuen ibilbidea txistu eta organo jole trebeak, herriko musikaren heziketan aritutakoa izan da. Olegarioren lankidetza “etenik gabekoa” izan da: 50 urte baino gehiago eman zituen “Errenteriako musikarien hezibideak musutruk prestatzen eta zabaltzen”, Ereintza elkartekoen arabera.
Ondorengoa da omenaldirako antolatu duten egitaraua:
- 18:15: Oarso bailarako eta lagunen txistulari kalejira.
- 18:45: Olegario eta familiaren ibilaldia Eleizaraino, bidean txistularien laguntza izango dute.
- 19:00: Maria Donea Zeruratzea Parrokian.
- 19:45: Omenaldia.
