Lehen sektorea sustatzeko diru-laguntzak eska daitezke
Abenduaren 1era arte eska daitezke laguntza horiek. Udalak 58.000 euro bideratuko ditu ustiategiak laguntzera, lehen sektorea "hauspotzeko".
![lehen sektorea laguntzak oiartzun](https://oarsoaldea.hitza.eus/site/files/2022/11/img_0256_2.jpg)
Lehen sektoreko proiektuak sustatzeko diru-laguntzak eska daitezke, abenduaren 1era arte. Udalak 58.000 euro bideratuko ditu herriko ustiategiak laguntzeko asmoz.
2022ko urtarrilaren 1etik abenduaren 1a bitarte egindako gastuak laguntzeko izango da diru-laguntza.
Honakoak izango dira udalak lagunduko dituen kontzeptuak: inbertsio eta ustiategien hobekuntzak; nekazaritza makineria eta ekipoen erosketa; baratzezaintza eta lorezaintza intentsiborako instalakuntzak; berrikuntza teknologikora edo belaunaldien errelebora bideratutako aholkularitza azterketa lanak; ekoizpen ekologikoa bultzatzeko egitasmoak; nekazaritza erabilerarako ur gastuak; abereen bazka eta pentsuen ordainketa…
Lehen sektorea hauspotu
Jexux Leonet alkatearen esanetan, diru-laguntza lerro irekitzearekin lehen sektorea lagundu nahi dute. “Lehen sektoreak bizi duen egoera ekonomiko gogorra arintzen lagundu nahi dugu”, zehaztu du.
“Jaten duguna ez dugu guk sortzen”, nabarmendu du alkateak. “Honek dependentzia eta kanpoko eragile eta erabakien menpe egotea eragiten digu. Herritar askeak izan nahi badugu, garrantzitsua da jaten duguna ere bertan ekoiztea”, jarraitu du.
Sektore horretako proiektuak laguntzen jarraitzeko “konpromisoa” adierazi du Leonetek.
Eskaerak
Eskaerak erregistro elektroniko bidez edo Udaletxeko sarreran aurkeztu beharko dira. Oinarriak, eskaera orria eta gainontzeko informazioa Oiartzungo Udalaren webgunean aurki daiteke.