[Bideoa] Euskaraldiari begirako erronka bota dute Antxoko gazteek
Azken hilabeteetako lanaren berri eman ondoren, euskararen aldeko desafioa bota du Antxoko Gazte Olatuak. Herriko kuadrilletan euskara gehiago entzun nahi dute, eta hori lortzeko plan bat diseinatu dute.
Gazte olatua adin desberdinetako Antxoko kuadrilletako bost ordezkarik osatu dute. Iragan urrian egin zuten Pasai Antxon bertako Euskaraldiaren aurkezpena, eta egun hartan aurreratu zuten aurkezleek barrutian badela gazte talde bat, «kuadrilletan euskara gehiago entzuteko asmoz» lanean dabilena euskararen aldeko ariketari begira. Erronka bat sortu dute, eta dagoeneko ari dira buru-belarri gonbidapena gazteen artean zabaltzeko ahaleginetan.
Irailean eratu zuten Nahia Iribar (2005), Maier Urizar (2004), Joseba Aizagirre (1999), Jon Goya (1998) eta Ekain Iribarren (1995) antxotarrek Gazte Olatua izenpean aurkeztu duten dinamika. Belaunaldi, eta beraz, kuadrilla desberdinetakoak dira denak.
Esan bezala, herriko gazteen artean euskara gehiago erabili dadin nahi dute, eta horretarako, egoeraren diagnosia egin behar izan zuten lehendabizi.
Diagnosia baino gehiago, zenbatespen bat egin zuten lehen fasean. Antxon zenbat gazte kuadrilla dauden jakin behar zuten zer-nolako erronka diseinatu erabaki ahal izateko.
16 eta 27 urte bitarteko 35 lagun talde identifikatu zituzten, baina ohartarazi dute «orientagarria oso» dela zifra hori, «ezinezkoa baita den-denak zehazki zerrendatzea». Oinarri horrekin gorpuztu zuten, geroago, 2022ko Euskaraldirako Gazte erronka.
Bi Ahobizi eta erdia Belarriprest
2022ko Euskaraldira begira gazteen artean zabaltzen ari diren erronka honakoa da: kuadrilla bakoitzeko gutxienez bi Ahobizi —«benetakoak»— lortzea, eta taldearen erdiak, bederen, rol batekin edo bestearekin Euskaraldian izena ematea. Bideo bat ere sortu dute gonbita lau haizeetara zabaltzeko [behean ikus dezakezu].
Erronkarako ekimena Antxoko gazteengandik sortu bada ere, gogorarazi dute deia pasaitar guztiei egin nahi dietela: «San Pedro, Donibane eta Trintxerpeko gazteak ere batu daitezela, kuadrilletan euskara gehiago entzun dezagun».
