Mutilek Añorgaren zelai zailetik ekarri dituzte hiru puntuak. Neskek, berriz, Errioxan irabazi dute, Pradejon Bren zelaian.
Garaipena ederki ospatu zuten oiartzuarrek. 
Oiartzungo mutilek bigarren garaipena jarraian lortu zuten pasa den ostiralean. Añorgaren zelai konplikatuan jokatu zuten, zementua baino gogorragoa den aurkariaren kontra.
Partidan sartzea kosta zitzaien oiartzuarrei, eta etxekoak aurreratu ziren markagailuan. Añorgakoen nagusitasunak ordu laurden besterik ez zuen iraun, eta 15. minututik aurrera, oiartzuarrek hartu zuten jokoaren gidaritza.
Atsedenaldira iritsi baino lehenago (38. minutuan), etorri zen oiartzuarren berdinketa, Donostiako taldeko jokalari batek bere atean sartutako golari esker.
Bigarren zatiak lehenengoaren bukaeraren bidetik jarraitu zuen, eta hamar minuturen faltan, Eñaut Fernandezek 11 metrotatik lortutako golak eman zien oiartzuarrei merezitako garaipena.
Modu horretan, sailkapeneko bigarren postura jauzi egin dute, Añorga bera aurreratuz.
Neskak, bikain
Emakumeen talde nagusiak, berriz, hilabete ezinhobea darama. Azken lau partidak irabazi ditu, eta hirugarren dira sailkapenean, nahiz eta denboraldian martxa hartzea kosta zitzaien.
Larunbat arratsaldean Pradejon Bren zelaian jokatu zuten. Partida nahiko parekatua izan zen, nahiz eta baloi-jabetza handiagoa izan zuen Oiartzun KEk.
Oiartzuarrak 35. minutuan aurreratu ziren, eta 0-1ekoarekin joan ziren aldageletara, Rebecaren gol bati esker. Bigarren zatian ildo bera jarraitu zuen partidak, baina Pradejonek kornerreko jokaldi batean berdintzea lortu zuen, partida bukatzeko hogei minutu falta zirela.
Oiartzuarrek ez zuten amore eman, eta Rebecak, berriro, talde jokaldi polit bat sareetara eramatea lortu zuen.
Emakumeen Lehen Nazional Maila
- Pradejon B — Oiartzun: 1-2.
Gizonezkoen Ohorezko Erregional Maila
- Añorga — Oiartzun: 1-2.
Emakumeen Euskal Liga
- Goierri-Gorri — Oiartzun B: 1-1.
Gizonen Gorengo Maila
- Oiartzun B —Orioko: 2-3.
Emakumeen Gorengo Maila
- Oiartzun C — Antigua Luberri: 4-0.
Mutilen Gazte Mailako Nazional Maila
- Oiartzun — Zarautz: 1-1.
Mutilen Gazte Mailako Gorengo Maila
- Gure Txokoa — Oiartzun B: 3-3.
Mutilen Gazte Mailako Lehen Maila
- Oiartzun C — Behobia: 2-4.
ARETO FUTBOLA
Gizonen Gipuzkoako Lehen Maila
- Eguzki Arkupe Rehabilitaciones — Oiartzun KE: 2-9.
Gizonen Gipuzkoako Bigarren Maila
- Miren Taberna OKE — Jaixki: 4-0.
Oiartzun Kirol Elkartearen egunerokoa jarraitzeko, jarraitu beraien Facebook, Twitter edota Instagram kontuak.
Oarsoaldeari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako. Herrigintza egin nahi dudalako. Oarsoaldeko euskarazko komunitatearen parte izan nahi dudalako. Oarsoaldeko herritarrok behar dugulako. Zure ekarpena behar dugu, babestu tokiko euskarazko komunikabidea.
