Lezo-Errenteriako geltokiko hiru burdinbide luzatzen ari da Adif
Pasaiako Portu Agintaritzak finantzaturiko obraren helburua Lezo-Errenteria eta Antxoko geltokien arteko merkantzia trafikoa arintzea da.
Adifen Lezo-Errenteriako tren geltokiaren hiru burdinbide luzatzeko obrak martxan dira. Lanen helburua Pasaiako Portu Agintaritzaren (PPA) lurrekin egun merkantziak garraiatzeko dagoen konexioa hobetzea da, eta PPAk hartuko du beregain (portuen finantza funtsari esker) 1’2 milioi eurotik gorako inbertsioa.
Aipatu geltokiak bi trenbide orokor ditu, eta beste bost aparteko burdinbide, trenak jaso eta bidaltzeko erabiltzen direnak. Portuak finantzaturiko obrei esker, bosgarren, zazpigarren eta bederatzigarren bideak luzatu egingo dira, gutxienez 550 metro neurtuko dituztelarik. Neurri berriarekin, hogei bagoi arte dituzten trenak hartu ahal izango dituzte hiru burdinbideek.
Adifeko ordezkariek uste dute jada martxan den luzapen obrak hobekuntzak ekarriko dituela portuko tren-trafikoaren alde, merkantzia garraioak handituko baitira eta, horiekin batera, baita “trafikoen efizientzia eta lehiakortasuna” ere. Portuaren trafiko nagusienen artean dago automobilena, eta horietako asko trenez iristen dira Lezo-Errenteriako geltokira. Obra berriak Pasai Antxo eta Lezo-Errenteria geltokien arteko garraiatze horiek aberastuko ditu, portutik irten edo bertara iristen diren trenen mesederako.
Jarduketaren zenbatekoa 1.253.710 eurokoa da, eta PPAk egingo du ordainketa, Lur-Portu Irisgarritasunerako Finantza Funtsaren finantziazioari esker. Espainiako portu agintaritza guztiek egiten diote ekarpena funtsari, eta horren sostengu den hitzarmenak dioenez, zenbait proiektu finantzatu ahalko dituzte portuek bertan dagoen diruarekin. Akordio horretxegatik, Adif da jarduketa gauzatzearen arduraduna, burdinbidearen titularra denez gero.