Hiruna gol, hiruna puntu lortzeko
OKEko bi futbol talde nagusiek garaipen politak lortu dituzte, Ugaldetxon, goialdean jarraitzeko. Areto futbolekoek launa egin dute bi partidetan.
Oiartzun Kirol Elkarteko bi futbol talde nagusiek garaipen politak lortu dituzte Karla Lekuonan. Lehenak jolasten neskak izan ziren, larunbat arratsaldean.
Azkar aurreratu ziren oiartzuarrak, Arratiaren kontra. Oso kontzentratuta irten ziren zelaira, eta hirugarren minutuan igorreztarrei baloi bat lapurtu eta, ongi antolatutako kontraeraso baten bitartez, baloia sareetaraino eraman zuten. Horrez gain, lehenengo zatian beste hiru aukera gehiago sortu zituzten.
Bigarren zatian, baina, indarrak parekatu ziren, eta norgehiagoka lehiatua izan zen… azkeneko bost minutura arte. Orduan sartu zituzten beste bi gol, emaitza biribiltzeko.
Laugarren postuan jarraitzen dute oiartzuarrek, arerioek ez zieteko gora egiteko aukerarik eman.
Mutilak, lider
Mutilen talde nagusiak atzo eguerdian Aretxabaletaren bisita jaso zuten, eta nesken bide beretik joan zen partida. Oso azkar aurreratu ziren, eta atsedenaldira arte aukera asko sortu zituzten, asmatu gabe.
Bigarren zatia hasi bezain pronto aldea handitu zuten oiartzuarrek, baina kanpokoek bi minututan murriztu dute. Hortik aurrera, oiartzuarrek beraien jokoa ezarri, eta modu horretan iritsi zen hirugarrena.
Garaipen horrekin, sailkapeneko lehen postura jauzi egin dute urdinek. Hernanirekin berdinduta daude, 27 punturekin (hamahiru jardunaldi jokatu dituzte).
Beste emaitzak
Gazte Mailako talde nagusiak ezin izan zuen hirukoa egin, eta Indartsuren zelaian galdu egin zuten. Partida txukuna egin arren, basauriarrek beraien legea ezarri zuten.
Areto futbolean, berriz, askotan gertatuko ez zen zerbait gertatu zen: bi taldeek ezohiko emaitza lortu zuten, launa berdinduta.
Emakumeen Lehen Nazional Maila
- Oiartzun — Arratia: 3-0.
Gizonezkoen Ohorezko Erregional Maila
- Oiartzun — Aretxabaleta UDA: 3-1.
Emakumeen Euskal Liga
- Oiartzun B — Leioako: 3-4.
Gizonen Gorengo Maila
- Oiartzun Bk atsedena izan du asteburu honetan.
Emakumeen Gorengo Maila
- Oiartzun Ck atsedena izan du asteburu honetan.
Mutilen Gazte Mailako Nazional Maila
- Indartsu — Oiartzun: 2-0.
Mutilen Gazte Mailako Gorengo Maila
- Oiartzun Bren ligan partida atzeratuak jokatuko dituzte. Ez da OKEren kasua izan.
Mutilen Gazte Mailako Lehen Maila
- Oiartzun Ck atseden hartu du asteburuan.
ARETO FUTBOLA
Gizonen Gipuzkoako Lehen Maila
- Ausa Zaldibia — Oiartzun KE: 4-4.
Gizonen Gipuzkoako Bigarren Maila
- Miren Taberna OKE — Getariako Keta: 4-4.
Oiartzun Kirol Elkartearen egunerokoa jarraitzeko, jarraitu beraien Facebook, Twitter edota Instagram kontuak.