Beratarbide eta Guillanen proiektuak irabazi du Torrealdai beka
'Artxibo biluzia' proiektuarengatik jaso dute ikerketa beka. Torrealdairen artxiboen lapurreta du abiapuntu; hemezortzi hilabete dituzte lana bukatzeko.
Oier Guillan proiektuaren sortzailea Idoia Beratarbiderekin batera, Agurtzane Solaberrieta Usurbilgo alkatearekin eta Haritz Azurmendi Jakineko kidearekin batera. Joan Mari Torrealdai ikerketa beka eman du, lehenengo aldiz, Usurbilgo Udalak, Jakin fundazioarekin elkarlanean. Euskara eta kultura gaurko eta biharko gizartean izan da gaia.
Hamahiru lan aurkeztu dituzte guztira, eta Artxibo biluzia izan da 14.000 euroko laguntza jaso duena. Oier Guillan eta Idoia Beratarbidek proposatuko proiektuak lortu du beka, eta hemezortzi hilabete izango dituzte lana bukatzeko. Epaimahaiak aho batez erabaki zuen saria nori eman.
Euskaldunon Egunkaria itxi eta Torrealdairi artxibo guztiak lapurtu zizkiotenean adierazi zuen “biluzik” utzi zutela intelektualki.
Atzo jakinarazi zituzten, publikoki, saridunen izenak, Usurbilen. Guillanek azaldu zuen hiru kezka izan zituztela abiapuntu gisa: antzerki dokumentalari buruzko kezka, gertakizun handien itzalean gelditu diren gertakizun txikiak gizarteratzea, eta ohiko formatuak bukatzeko behar eta nahi bat.
Sorkuntza eta prestakuntza dira Artxibo biluziak lanaren ardatza. Horrez gain, Guillanek iragarri zuen hiru gairi buruzko beste hainbeste pieza prestatuko dituzte datorren udaberrian.
Datorren urteko udazkenerako, berriz, performance tailerrak antolatuko dituzte. Istorio bat transmititu nahi duen edonork parte har dezakeela ziurtatu zuen.
