Musika zaleek hitzordu bikoitza izango dute larunbatean
Eguerdian Kantujirak herriko kaleak girotuko ditu, eta arratsaldean berriz, ganbara musika kontzertua eskainiko du Tomas Garbizu Lezoko Musika Eskolak.
Musika herrikoia maite dutenek hitzordu bikoitza izango dute etzi (hilak 10) Lezon, kantujira eta ganbara musika kontzertua eskainiko baitituzte.
Kantujira 12:30ean hasiko dute, Aiton Bordatik abiatuko dira, eta Kaialde eta Kale Nagusian geldialdia egin ondoren, Gurutze Santuaren plazan bukatuko dute saioa. Herritarrak parte hartzera deitu dituzte, “kantekin giro atseginean eta lagun giroan abesten gozatzeko”.
Bestetik, ganbara musika kontzertua antolatu du larunbaterako Tomas Garbizu Lezoko Musika Eskolak. 16:30ean hasiko dute saioa, eta ondorengoek parte hartuko dute: Ioannes Sagarzazu, David Bergman, Ane Espina, Myriam Hamela eta Irene Sagarzazu. Haiekin batera, Esther Berandiaran eta Laura Mota piano jotzaileak ariko dira.
