Odola emateko zita jarri dute datorren asteartean
Oiartzungo odol-emaileek bi hilean behin egiten duten odol-emate saioa hilaren 13an izango da. Hitzordua hartu beharko da aldez aurretik.
Urteko hilabete bikoitietan egin ohi den bezala, Oiartzungo odol-emaileek zita izango dute datorren asteartean, hilak 13. Odola emateko aukera egongo da Manuel Lekuona bibliotekan.
Txanda hartu beharko da lehenagotik. Horretarako, 943 00 78 85 edo 943 31 70 91 telefono zenbakietara dei daiteke, asteartean bertan, 08:00etatik aurrera. Jende pilaketak saihestu nahi dituzte horrekin, baita bertan ahalik eta denbora gutxien pasatzeko ere.
Odola emateko ordutegia 16:30ean hasiko da, eta 20:10era arte izango dira bertan. Ohi bezala, odol-emaileen elkarteak oiartzuarrak animatu ditu likido gorria eman dezaten, batez ere jende gaztea.
Urrian egindako saioan 58 lagunek hartu zuten parte, eta honakoak izan ziren zenbakiak.
Datuak
- O+: 23.
- O-: 10.
- A+: 17.
- A-: 4.
- B+: 2.
- B-: 1.
- AB-: 1.
Hurrengo zita otsailean izango da. Bitartean, odol-emaileen elkarteak Eguberri eta Urteberri onak opatu dizkie oiartzuarrei.
