Beatriz Egizabalek 'Magma Mia' taularatuko du igandean
Oiartzungo Antzerkizaleen Elkarteak abendurako antolatu dituen bi bertso saioetako bat izango da. Bestea haurrentzako izango da.
Beatriz Egizabalek bakarrizketa feminista eta umoretsua proposatuko du igandean.
Oiartzungo Antzerkizaleen Elkarteak bi saio antolatu ditu abendurako. Lehenengoa datorren igandean izango da —hilak 18—, udaletxeko pleno aretoan, 19:00etan hasita.
Bea Egizabalek Magma Mia umorezko bakarrizketa jokatuko du. Bakarrizketa feminista da, militantziatik asko, baina umoretik are gehiago du. Barreez gain, hausnarketa ere eragitea da helburua.
Sarrerak txokolategian eros daitezke, bost euroren truke. Sobratuko balira, igandean bertan eros daitezke.
Kaskarot
Hilabete honetarako bi saio programatu dituzte. Bigarren hori haurrentzako izango da: Atx Teatroaren Kaskarot. Hilaren 30ean izango da, pleno aretoan baita ere, 18:00etan hasita. Sarrerak aurrerago jarriko dituzte salgai.
Hau da sinopsia:
Agure batek istorio bat kontatuko du. Aner gizarte distopiko batean bizi da, non dantzatzea debekatuta dagoen. Anerri izugarri gustatzen zaio dantza egitea eta horrek arazo larriak sortzen dizkio. Kaskarot Anerren “alter egoa” da. Bere ingenio eta zentzuaren bidez, Anerri erakutsiko dio bere egoerari buelta ematen eta arauen aurrean bere adierazpen askatasuna lehenesten.
