Barandiaran parkearen deskontaminazio lanak, martxan
Hainbat hamarkadatan lurzorua kutsa dezaketen industria jarduerak jasan ditu eremuak, eta horregatik, egungo orubeko lurzoruaren kutsadura maila aztertu eta ezaugarritzeko lanak hasi dituzte.
Pontika auzoko Barandiaran parkean deskontaminazio lanak hasi berri ditu udalak. Hainbat hamarkadatan lurzorua kutsa dezaketen industria jarduerak jasan ditu, eta horregatik, egungo orubeko lurzoruaren kutsadura maila aztertu eta ezaugarritzeko lanak hasi dituzte.
Lanekin hasteko, 40.000 litroko edukiera duen fuel-olio biltegi bat kenduko dute lehenik, udalaren arabera, “baldintza txarretan dagoena eta hidrokarburo kantitate esanguratsuak dituena”. Biltegia kentzeaz gainera, ingurunean hidrokarburoak deskontaminatzeko lanak eta beharrezko analisiak ere egingo dituzte.
Lanak urtarrilera bitarte luzatuko dituztela aurreratu dute, eta 44.421,58 eurook aurrekontua izango dutela.
Parkea, gertuago
Lanekin batera, indusketa plan bat ere idatzi du udalak, etorkizuneko parkearen diseinuan oinarritutakoa. Zentzu horretan udalak dio azken urte honetan parkea eraikitzeko “ezinbesteko lanak” egin dituztela. Udaleko iturriek gaineratu dutenez, urrats hauek, deskontaminazio lanekin batera, “parkea errealitate bihurtzeko atarian” kokatuko dute auzoa.
