Emakumeak musikaren industrian, gaur, Gezalako solasaldian
Zazpi emakume musikariren testigantza entzun ahal izango da gaur, 19:00etan hasita, Lezoko aretoan.
Kultur Femme egitasmoaren barruko solasaldia jasoko du gaur Gezala Auditoriumak, 19:00etan hasita. Emakumeak musikaren industrian du izenburu hizketaldiak, eta horri forma emateko, zazpi emakume musikari izango dira Lezoko aretoan: La Basu, Estrella Electronica, Noa Egiguren, Vittersweet, Ainhoa Larrañaga, Isa Villanueva, eta Lidia Insausti. Myriam Mirandak gidatuko du saioa.
Solasaldiaren asmoa da emakumeek egungo musikan zein toki duten aztertzea, eta gogoeta horri hainbat adarretatik eutsiko diote Gezalan izango diren musikariek. Hala, bakoitzak bere esperientzia eta jakinduriatik, musikaren munduaren zirrikituetatik dabiltzan joeren berri emango du, betiere emakumearen presentzia erdigunean izanda.