2023ko aurrekontuak "anbizio gabekoak" direla salatu du PSE-EEk
Herrirako garrantzitsuak diren proiektu asko alde batera utzi dituztela salatu dute sozialistek. "Ez gara izango herritarren beharrei bizkarra ematen dien alkate baten konplize, proiekturik gabekoa eta auzoak gutxiesten dituena".
PSE-EE taldeko Isaac Palencia eta Iñaki Ruizek agerraldia eskaini dute gaur, 2023ko aurrekontuen gainean egindako irakurketa elkarbanatzeko. “Anbizio gabeko” aurrekontuak direla esanez hasi dute gaurko agerraldia. “Aurrekontu hauek betikoak dira. Ez gara izango herritarren beharrei bizkarra ematen dien alkate baten konplize, proiekturik gabekoa eta auzoak gutxiesten dituena”.
Aurrekontuetan “ingresu faltsuak” sartu dituztela ere esan dute, “eragin gabeko kudeaketa loditzeko” asmoz. “Jaurlaritzak 640.000 euro bakarrik emango badizkigu, nondik ateratzen dira aurreikusitako 1,8 milioi euroak?”, esan dute, besteak beste.
Herrirako garrantzitsuak diren proiektu asko alde batera utzi dituztela ere salatu nahi izan dute gaurkoan. “Anbiziorik gabeko eta herrirako proiekturik gabeko aurrekontuak dira”.
Horregatik, datorren astearteko osoko bilkuran hainbat emendakin aurkeztuko dituzte sozialistek.
