'Joanes etxera' lasterketa egingo dute urtarrilaren 15ean
Herri lasterketan izena emateko epea zabalik dago. 6'5 kilometroko ibilbidea prestatu du Sarek, helduentzako. Haurrek ere parte hartzeko aukera izango dute.
Lasterketa 2013an antolatzen hasi ziren. Herriko lasterkari talde batek eta Sarek Joanes Etxera lasterketa antolatu dute urtarrilaren 15erako (igandea izango da). 6’5 kilometroko ibilbideari aurre egin beharko diote parte-hartzaileek.
11:00etan hasiko da helduentzako herri lasterketa, plazatik. Ergoien, Altzibar, Iturriotz, Ugaldetxo eta berriro Elizaldera itzuliko dira lasterkariak.
Izen-ematea aurten online bakarrik izango dela aurreratu dute, Herrikrosa webgunearen bitartez. Izen emateak 12 euro balio ditu, aurrez egiten bada, eta 18 egunean bertan. Bigarren aukera hori, noski, aurretik dortsal guztiak saldu ez badira.
Antolatzaileek, hala ere, ahal bezain pronto izena ematea eskatu dute, tokirik gabe ez geratzeko eta antolakuntza lanak errazteko. Urtarrilaren 13a izango da izena emateko azkeneko eguna.
Haurrentzako lasterketa
Helduen lasterketa hasi baino lehen irtengo dira haurrak. Izena egunean bertan eman beharko dute, eta adinaren araberako taldeak osatuko dituzte, plazari buelta bat edo bi emateko.
Sari banaketak 12:30ean izango dira. 2013an hasi ziren lasterketa antolatzen.
