Ispiluaren aurrean, norbera onartu eta epaiak uxatzeko
Haziak proiektuak ‘Ispiluak’ liburua kaleratu du, haurrei zuzendutakoa. Besteak epaitzeari uzteko «elkarrizketa osasuntsuak» sortu nahi dituzte Nekane Martiarena eta Nora Barroso egileek.
Pasa den larunbatean Errenteria-Oreretako Lekuonan aurkeztu zuten 'Ispiluak'. Haziak proiektuak beste fruitu bat eman du: Ispiluak haurrei —eta haur ez direnei— zuzendutako liburua. Nekane Martiarena eta Nora Barrosok idatzi dituzte testuak, eta Eider Eibarrek ilustratu du liburua. 1545 argitaletxearekin argitaratu dute.
Liburuarekin irakurlea ispiluaren aurrean jarri nahi dute. Uda inguruan hasi ziren proiektua mamitzen, eta urrian gorpuztu zuten. Horrela azaldu dute Barrosok eta Martiarenak: «Gu beti gabiltza gauzak sortzeko nahi eta behar horrekin. Askotan ideia bat izaten da, eta horren bueltan lanean hasi eta emaitzak irteten dira».
Emaitza hori hainbat zutaberen gainean eraiki dute: generoa, onarpena eta epaiketa. Egileei «garrantzitsua» iruditzen zaie «elkarrizketarako bide eta guneak» irekitzea. Bukaerako emaitza «mimo osoz prestatutako eta zaindutako» materiala dela ziurtatu dute.
Haziak proiektuak landu izan ditu onarpena eta generoaren gaia, eta argi dute zergatik egiten duten: «Eguneroko bizitza onarpena da, baita generoa zein epaiketak ere… Uste dugu gaiaren inguruan hausnarketa egin behar dugula, elkarrizketa osasuntsuak sortu behar ditugula, besteak epaitzeari utzi behar diogula».
Martiarena eta Barrosok ez dute ipuinaren «magia» aurreratu nahi izan, eta horren berri izatea irakurle bakoitzaren esku utzi dute. Liburua «hausnarketarako eremua» dela berretsi dute, baina desio bat daukate: beraien liburuak ez duela besteen hitzik mugatu nahi. «Ipuinak geruza ugari ditu eta bakoitzak behar dituenak ikusi eta jasoko ditu», zehaztu dute.
Eguneroko bizitzan aurki daitezkeen gaiei buruz hausnartu nahi dute
Eider Eibar ilustratzaile zornotzarraren esku geratu da liburuaren alde grafikoa. Haziak proiektuan hasieran engaiatu zen. «Eider Eibarrekin aspalditik dugu harremana, beste proiektu batzuetatik ezagutzen dugu eta Haziak-en hasiera-hasieratik dago. Argi genuen bere ilustrazioak erabat uztartzen zirela egitasmo honetan, hitzik gabe asko adierazi eta esango zuela. Eta uste dugu halaxe izan dela. Mimo osoz eta askoz egindako lana osatu dugu elkarrekin», esan dute Barrosok eta Martiarenak.
Eskuratzeko aukera
Haziak proiektua eta 1545 argitaletxea elkarlanean aritu dira, aspaldiko lagunak baitira bertako kideak, eta ez aurreko hainbat proiektutan bidelagun izan direlako. «Guretzat garrantzitsua da elkar elikatzea, elkarrengan sinestea, elkar zaintzea… 1545 argitaletxea gure etxea sentitzen dugu», azaldu dute.
Liburua Oiartzungo ikastetxeetan banatu dute, Haur Hezkuntzatik hasi eta Lehen Hezkuntzako bigarren mailara arteko gela guztietan. Ikasle guztiek eraman dute bat etxera. LH6ra arteko gela guztietan, berriz, ale bat utzi dute. Ikastetxeetako liburutegietan aurki daiteke, baita Abaraxka ludotekan eta Manuel Lekuona bibliotekan ere.
Horrez gain, online eska daiteke, 1545 argitaletxearen webgunean, edo Haziak proiektuarekin berarekin zuzenean posta elektroniko bidez harremanetan jarrita.
