Azken bi erailketa matxistak salatu dituzte errenteriarrek
Azken egunetan Euskal Herrian izandako bi erailketa matxistak salatzeko protesta egin zuen ostiralean Oreretako Mugimendu Feministak.
Oreretako Mugimendu Feministak protesta egin zuen joan den ostiralean, azken egunetan Euskal Herrian izandako bi erailketa matxistak salatzeko. Indarkeria matxistari dagokionean, 2022a “ilun” bukatu dela esan zuten lehenik, haserre. Getxoko eta Bilboko emakumeen erailketengatik “amorrua” adierazi zuten. Orotara, iaz Euskal Herrian lau emakume erail zituztela esan zuten, haserre. “Ez dira kasu isolatuak, egunero kolpatzen eta erailtzen gaituen sistema baten ondorio krudelena baizik”.
Getxoko kide transaren erailketaren harira, mugimenduak adierazi du transexualen kontrako gorroto mezuak “oso presente” daudela oraindik, eta erasoak ugaritzen ari direla. Bestetik, Bilbon eraildako emakumea gogoratu dute, “emakumea, migratua eta arrazializatua izateagatik hamaika indarkeria pairatu behar izan dituena”.
Instituzio publikoei baliabideak eskatu dizkiete beste behin, haien arabera, jendarteak aldaketa beharra duelako, “jarrera matxistak eta sexistak behingoz bukatu arte”. Osasungintza, hezkuntza eta justizia publiko eta unibertsala aldarrikatzeko ere probestu zuten ostiraleko mobilizazioa, “izan ere, babestu behar gaituztenen joko arauak berriro porrot egin du”.
“Borroka hau geldiezina da, eta feministok beti izango dugu indarra eta ausardia aurrera egiteko, izan direnengatik eta izango direnengatik”, esan zuten azkenik.
