Etxebizitza Bulegoak 221 maizterri eman die zerbitzu
Oiartzungo 55 etxejabek bideratu dute beraien etxebizitza bulegoaren bidez. Une honetan 32 maizterrek behar dute alokairu soziala, azaldu dutenez.
Agustin Lekuona Hirigintza zinegotziak eta Olaia Lasa Gizarte-Ongizateak adierazi dutenez, bultzada eman diote Etxebizitza Bulegoari. Oiartzungo Udalak eta Alokabidek Etxebizitza Bulegoa martxan jarri zuten 2016an, etxebizitza hutsak alkairura bideratzeko. Urte hauetan guztietan egindako lanaren datuen berri eman dute.
Bulegoan martxa jarri zutenetik, 221 maizterri eta 55 etxejaberi eman diote aholkularitza. Momentu honetan, hamalau dira etxejabeak, eta 32 maizterrek behar dute laguntza, Etxebizitza Bulegoak azaldu duenez.
“Zerbitzua abian jarri zenetik bilakaerak gora egin du, bereziki, maizterren kasuan”, adierazi du Etxebizitza Bulegoak. “Izan ere”, jarraitu dute, “urtero handitu da alokairu soziala lortzeko eskatzaileen eskaerak”.
Bultzada
Oiartzungo Udalak bultzada bat eman nahi dio proiektuari, eta horregatik etxe bila dabiltzanei zein hutsa dutenei Etxebizitza Bulegoaren onurak adierazi nahi dizkiete. Horrela, erakundeak dei egiten die, “bereziki”, etxebizitza hutsa duten jabeei.
Onura horiek zein diren zerrendatu dizkiete etxejabeei: “Oiartzungo Etxebizitza sozialeko Bulegoaren bidez alokatzea irtenbide ona izan daiteke hileko diru-sarrera finkoak sortzeko, eta horrek lagundu egin diezazuke higiezinak berak sortzen dituen gastu finkoei aurre egiten (zaborrak, ura, OHZ, erkidegoa, asegurua, hipoteka, halakorik balego)”.
Hamar puntutan laburbildu dituzte:
- Arrisku anitzeko etxe-asegurua doan. Gainera, lagapenaren unean zenuen kontserbazio-egoera berean itzuliko dizugu etxebizitza (erabilpenagatik eragindako ohiko higadurak salbu).
- Alokabideren aseguru hirukoitza ASAP edo Bizigune programetarako. Juridikoa, kaudimena (maizterrak alokairua ordaintzen ez badu) eta balizko kalteen aurrean.
- OHZren %50eko deskontua.
- 60 euroko errenta osagarria 12 hilabetez, udaletik jasoko duzuna.
- Eraginkortasun Energetikoaren Ziurtagiria lortzeko laguntza (gehienez 100 euro).
- Doako alokairuaren kudeaketa osoa. Ez duzu fidantza-izapideak egiteaz edo alokairuarekin lotutako beste edozein ekintzaz arduratu beharko, errentamenduaren kudeaketa osoa etxebizitza-bulegoak egiten baitu.
- Programan bost urtez egoteko konpromisoa.
- Berritze-proiektuaren finantzaketa (3.000 euro arte).
- Obra-lizentzietan %95eko hobaria.
- Gizarte-onura. Alokairu duin bat behar duten pertsonei lagunduz, lan soziala egiten ari zara udalerrian.
Harremana
Etxebizitza Bulegoak egiten dituen lanen berri eman dute: izapidetze-lanak egitea; aukeren berri ematea; kudeaketa-lana; laguntzak eta diru-laguntzak bideratzea; kontsultarako eta izapidetzeko informazio-gune izatea; Etxebediren izapideak bertatik egitea…
Abantaila horien guztien berri izateko edota izapide guztiak egiteko, aurretiko hitzordua eskatu behar da 943 494 129 telefono zenbakira deituta. Astelehenetik ostiralera, 9:00etatik 14:00etara da ordutegia.
E-posta bidez ere jar daiteke harremanetan, helbide honetara idatzita.
