Areto futboleko Gipuzkoako Kopa Oiartzunera etorri da
Herrikide Tolosako taldea gainditu dute oiartzuarrek, gol bateko aldearengatik. Ibarran nagusitu dira oiartzuarrak.
Gipuzkoako txapeldun berriek argazkia atera zuten partida bukatzean, koparekin.
Pasa den ostiralean jokatu zuten, Ibarrako kiroldegian, areto futboleko Gipuzkoako Kopako finala. Bertan Tolosako Herrikide taldeak eta Oiartzun Kirol Elkarteko areto futbol talde nagusiak neurtu zituzten indarrak. Astebete lehenago lortu zituzten bakoitzak bere finalerako txartela.
Lehia parekatuan, oiartzuarrak nagusi izan ziren, eta kopa Karla Lekuonara ekartzea lortu zuten. Gol bakarreko aldeagatik irabazi zuten (3-2), baina nahikoa kopa altxatzea ziurtatzeko.
Urtea modu bikainean itxi dute, beraz, oiartzuarrek. Datorren asteburuan ligara bueltatuko dira oiartzuarrak, Egintzaren kontra, Villabona-Amasako kiroldegian. Hamar partida jokatuta, sailkapeneko zazpigarren postuan daude.
