Izaskun Gomez, berriro alkate izateko PSE-EEren hautagaia
Gaur goizean aurkeztu du orain arteko alkateak berrautaketarako hautagaitza. "Pasaia berdin eta askeago bat" promestu du.
Izaskun Gomez Cermeño, gaur goizeko aurkezpen ekitaldia bukatuta. 
Gaur goizean aurkeztu du Izaskun Gomez Cermeñok Pasaiako alkate izaten jarraitzeko hautagaitza, Trintxerpeko Alkateordetzan. Ekitaldian Jose Ignacio Asensio Gipuzkoako PSE-EEko Idazkari Nagusiaren babesa izan du, bai eta udal taldea osatzen duten gainontzeko zinegotziena ere.
Berrautaketa aurkezteko mintzaldian asebete agertu da azken legegintzaldian egindako lanarekin, eta lau urte “gogor” horien gaineko balorazioa egin du, harro. Koalizio sozialistaren lorpenak bitan laburbildu ditu: “Batetik, udala beti egon dela herritarren alboan”, eta bestetik, “proiektu estrategikoei emandako bultzada”.
Azken horien gaineko errepasoa egin du Gomezek gaur: inauguratu berri duten Trintxerpeko aparkalekua, Adinberri, Andonaegi auzoa zaharberritzeko proiektua, Luzuriagarako EH Bilduk adosturiko inbertsioa, Lonjako plaza berriaren inaugurazioa eta hori estaltzeko proiektua, Donibaneko saneamendua, zuntz optikoaren eskaintza, Itsas Festibala… eta hark “eraldatzailetzat” jo duena: Antxoko topoa lurperatzeko obra.
Pasaiaren norabidea bide onean doala ziurtatu du. Horra hor bere hitz batzuk, gazteleratik euskarara ekarrita: “Pasaia aurrera doa, eta gure eskuetan dago horrela jarrai dezala. Pasaia hori errealitate bat izango da lau urtetan, baldin eta norbaitzuk ez badira saiatzen hori geldiarazi eta boikotatzen”.
Hori esanda, hurrengo legegintzaldian berriro alkate izango balitz haren politikek zein ardatz izango lituzketen zehaztu du PSE-EEko buruak: “Pasaia berdinago bat, askatasun eta ongizate handiagoarekin; horren alde lanean jarraitu nahi dut, alkate gisa, herritar gisa eta sozialista gisa”. Gainontzeko taldeekin “elkarrizketan jarraitu” nahi duela berretsi du, eta gogorarazi du azken legegintzaldian alderdi guztiekin lortu dituztela akordioak, batekin [EH Bildu] izan ezik, “zeinak, dirudienez, beste interes batzuk dituen”.
Bukatzeko eskerrak eman dizkie gainontzeko zinegotziei, baita Pasaiako PSE-EEko afiliatuei eta Gipuzkoako alderdi sozialistari. Pasaiako PSE-EEkoei esan die “burua gora” jarrai dezatela, legegintzaldia bukatu baitute “aurkezpen gutun zoragarriarekin; batzuen gogoz bestera”.
Gomezen aurkezpenarekin, Pasaian ordezkaritza duten alderdi politiko guztiek jarri dituzte, jada, maiatzeko hauteskundeetarako euren alkategaiak jendaurrean. Ahal Duguk Julen Rodriguez Aboy proposatu du berriro; EAJk, berriz, lehen aldiz Loreto Osa Ocon; eta, azkenik, EH Bilduren mahai politikoak Teo Alberro Bilbao.
