Xenpelar-Biteri bidegurutzea eraberritzeko lanak hasi dira
Lanekin, Biteri kale osoaren antzera, errepidearen eta espaloiaren kotak berdinduko dira. Otsailaren 15era arteko epean egingo dituzte obrak.
Gaur, astelehena, hasi dira Xenpelar kalearen eta Biteri kalearen arteko bidegurutzea eraberritzeko lanak. 44.682 euroko aurrekontuarekin, Errenteriako Udalaren aurreikuspena da otsailaren 15erako bukatzea obra.
Aurretik egindako hainbat lanen segida da bidegurutzekoa. Hala, Xenpelar 2ko eraikina bukatuta (Koldo Mitxelena plazarako sarrera-irteera estalia sortu dute, besteak beste), kalea bera urbanizatzeko lanak dira hasi berri direnak. Errepidearen eta espaloiaren kota berdinduko dituzte, Biteri kale osoan bezala ibilgailuentzat eta oinezkoentzat plataforma bakarra lortzeko. Aldi berean, obren bitartez Biteri Txikiko zoladura konponduko da, han harlauzen ondoratzeak izan direlako.
Lanengatik, Xenpelar kaletik Biteri Txikirako eta Erbiti kalerako sarbidea moztu dute. Gainera, otsailaren 2an eta 3an (ostegunean eta ostiralean, Xenpelar kalea erabat itxiko dute. Aurrerago ere mozketa gehiago izango direla aurreratu du udalak, margotze eta inprimatze lanak egiteko (eguraldiaren arabera).
