Zelairik zailenean, puntua poltsikora
Oiartzun KEko emakumeek puntu bat lortu dute liderraren etxean. Mutilek ere berdindu egin dute, Karla Lekuonan.
Zubietatik meritu handiko puntu bat ekartzea lortu zuten oiartzuarrek. Oiartzun Kirol Elkarteko neskek ez dute garaipenik lortu asteburuan, baina puntu gozoa lortu zuten. Izan ere, Zubietan jokatu zuten, liderraren zelaian.
Realak baloi jabetza handiagoa izan zuen, eta beraiek izan ziren aurreratu zirenak, Oiartzunek egindako akats bati esker. Bestela, ez zuten aukera handirik sortu.
Oiartzuarrak ez ziren burumakur geratu, eta jasotako kolpeari buelta eman zioten. Defentsan bikain aritu ziren, eta pixkanaka aukerak sortzen joan ziren, Ixiarrek berdinketa lortu arte.
Sailkapenean koska bat behera egin dute neskek, baina sentsazio onekin bukatu zuten partida. Izan ere, Realak hamazazpi partidetatik bakarra galdu eta bigarrena berdindu zuen larunbatean. Logroñesen bisitari aurre egiteko pilak kargatu zituzten.
Mutilek ere, bana
Mutilen talde nagusiak ere berdindu egin zuen, Tolosaren kontra. Larunbat arratsaldean Ugaldetxon jokatutako partidan, oiartzuarrak nagusitasun handiarekin atera ziren zelaira.
Jokoaren jabe izanda, aukerak sortu zituzten mutilek, baina ez zuten ate aurrean asmatu. Atsedenaldiaren aurretik, baina, oiartzuarrek akats bat egin zuten eta tolosarrak aurreratu egin ziren.
Bigarren zatian oiartzuarrek atzaparra atera zuten, eta horrela iritsi zen berdinketa, 77. minutuan. Aukera gehiago sortu zituzten, baina ez zuten hiru puntuak emango zituzkeen gola aurkitu.
Areto futbolean, garaipenak
Talde nagusiak Andoainen garaipen sendoa lortu zuen. Hamargarren minutuan aurreratu ziren, baina hamar minutura berdindu zuen Euskaldunak. Hurrengo jokaldian berriro aurreratu ziren oiartzuarrak, eta atsedenaldira 1-3 bueltatu ziren.
Bigarren zatian oiartzuarrek defentsa sendoa erakutsi zuten, aukera asko sortu zituzten bitartean. Beste lau gol lortu zituzten, eta emaitza ikusgarria ekarri zuten.
Miren Taberna OKEk ere hiru puntu lortu zituen, Ttakunen kontra, Elorsoron. Azkoitiarrak aurreratu arren, atsedenaldira 2-1 iritsi ziren, oiartzuarrak aurretik zirela. Bigarren zatian gol bana sartu, eta garaipenari esker igoerako play-off postuetan sartu da Miren Taberna OKE.
FUTBOLA
Emakumeen Lehen Nazional Maila
- Real Sociedad B — Oiartzun: 1-1.
Gizonezkoen Ohorezko Erregional Maila
- Oiartzun – Tolosa: 1-1.
Emakumeen Euskal Liga
- Oiartzun B — Ipar Arriaga Gasteiz: 5-0.
Gizonen Gorengo Maila
- Oiartzun B – Ostadar: 2-4.
Emakumeen Gorengo Maila
- Oiartzun C — Irauli Bosteko: 4-0.
Mutilen Gazte Mailako Nazional Maila
- Eibar B — Oiartzun: 3-0.
Mutilen Gazte Mailako Gorengo Maila
- Astigarragako Mundarro – Oiartzun: 0-4.
Mutilen Gazte Mailako Lehen Maila. Kopa.
- Oiartzun C — Gure Txokoa B: 4-1.
ARETO FUTBOLA
Gizonen Gipuzkoako Lehen Maila
- Euskalduna — Oiartzun: 1-7.
Gizonen Gipuzkoako Bigarren Maila
- Miren Taberna — Ttakun AFE: 3-2.
