Lezoko EH Bildu: "Aparkaldi mugatuaren neurriak hartzeko ez da azterketarik egin"
Herriko hainbat kaletan aparkaldi mugatua ezartzea onartu zuten joan den asteko udalbatzarrean gobernu taldeko alderdiek. Zalantzak azaldu ditu EH Bilduk.
Joan den urtarrilaren 26ko udalbatzarrean Lezoko hainbat eremutan aparkaldi mugatua ezartzeko erabakia onartu zen, gobernu taldeko alderdien aldeko botoarekin (EAJ eta PSE-EE). Lezoko EH Bilduk, onetsitako neurriak egokiak izan daitezkeela esan, baina horiek ezartzeko azterketarik ez dela egin adierazi du, “horrek, neurriak eraginkorrak ez izatea eta lezoarrentzat traba bilakatzea eragin dezake”. Ordenantza bidez egikarituko diren neurriak “susmo eta usteetan” oinarritu direla uste du koalizioak, “errealitatean oinarritutako datuak behar dira”.
Zehazki, honakoa da udalbatzarrean aurrera atera zen proposamena: Polentzarrene, Hipolito Gezala, Guillermo Lazon, Zubitxo (23. zenbakitik 37ra), eta Elias Salaberria kaleetan lezoarrek soilik aparkatu ahal izatea, 20:00etatik 08:00etara. Eguneko gainontzeko orduetan edonork aparka dezake eremu horietan. Horretarako, eranskailu bat jarri beharko dute lezoarrek autoetan, udalean eskatu beharko dena, 10 euroko kostuarekin.
“Neurri horren proposamenean ez da inolako azterketarik agertzen”, azaldu dute bilkideek. Azterlanen falta hori gobernukideek beraiek onartu dutela azaldu dute koalizioko kideek, bai gaia aztertzeko batzordeetan zein udalbatzarrean bertan. “Hau da, kale horietara aparkatzera Lezotik kanpoko herritarrak etortzen ote diren jakin gabe hartu du erabakia gobernu taldeak”. Beste erabaki baten gaineko zalantza ere agertu du EH Bilduk, hainbat kaletako trafikoaren norabide aldaketarena, “kasu horretan ere ez dago neurrik horrek sor ditzakeen ondorioen azterketarik”.