Donibaneko saneamenduaren proiektuari alegazioak aurkeztu dizkio EH BIlduk
Izapidetzea azaroan ireki zuen Gipuzkoako Foru Aldundiak, eta ordutik hainbat hutsune identifikatu ditu koalizioak.
Pasai Donibane. 2022ko azaroan ekin zion Gipuzkoako Foru Aldundiak Pasai Donibaneko Saneamendu Proiektuaren 1. fasearen izapidetzeari. Planaren iraunkortasunak, integrala ez izateak (hainbat familia saretik kanpo utziko direla aurreikusten baita), eta gasaren instalazioa proiektutik kanpo utzi izanak, abenduan zazpi alegazio (galdera formatuan) aurkeztera bultzatu zituen EH Bildu.
Orain, Pasaiako eta Gipuzkoako EH Bilduk beste hainbat galdera egin dizkiote Obra Hidraulikoen diputatuari. Gabeziak aipatzerako garaian, hainbat auzitan jarri dute arreta:
EH Bilduren arabera, Foru Aldundiak eta Pasaiako Udalak bizilagunei ur sanitario beroa ez diete eskaini. Bestetik, parte hartze prozesuan hainbat herritarrek egin zituzten galdera eta adierazi zituzten zalantzak ez ditu argitu, udalak horretarako saio bat antolatuko zuela agindu zienean bizilagunei. Gainera, PSE-EEk parte hartze prozesu “handiena” izan dela aldarrikatu dutela salatu dute.
Egoera hori izanda, koalizioak planteamendu “serioa” egiteko galdegin die Pasaiako Udalari eta Gipuzkoako Foru Aldundiari. Larrialdi Klimatikoko egoeran itsasoa kutsatzen jarraitzea “zilegi ez dela” adierazi dute, eta proiektuak isuri guztiak jaso ditzala. Hortaz gain, gasaren instalazioa barnebilduko ez badu, alternatibak bizilagunekin kontsulta ditzatela, eta hauek udalari egin zizkioten galderak argitzeko deboluzio saio bat antola dezatela, elkarlana “etengabea” izan dadin.
